Qazaqstanda 200 myńǵa jýyq estý qabileti tómen azamat bar, olardyń jartysynan astamy eńbekke jaramdy. Degenmen, jumysqa ornalasý máselesi kúrdeli. Jumys berýshilerdiń aıtýynsha, mundaı adamdardyń kópshiligi qajetti biliktilikke ıe emes. Bul eńbekke jaramdy jandardyń múmkindikterin shektep qana qoımaı, olardyń ómir súrý sapasyna da aıtarlyqtaı áser etedi.
Manıkúr jasaýshy Elmıra Amanjolova osy máselelerdiń barlyǵyn óz ómirinde sezingen. Úsh jasynda tumaýdan keıingi asqynýdyń saldarynan estý qabiletinen aıyrylǵan ol mektepti aıaqtaǵan soń manıkúr jáne makıaj kýrstaryn oqyǵan. Qazirgi tańda klıentterin óz úıinde qabyldap, qyzmet kórsetýde. Alaıda, sulýlyq salonyna jumysqa ornalasý múmkindigi joq ekenin aıtady, sebebi estý qabiletiniń shekteýligi qarym-qatynas jasaýda qıyndyq týdyrady.
- Bir kúnde birneshe klıent qabyldaımyn. Manıkúrden bólek, makıaj jasaı alamyn. Ózimniń sulýlyq salonymdy ashýdy armandaımyn, shaǵyn ǵımaratty jalǵa alǵym keledi. Biraq estý qabileti tómen adamdarǵa arnalǵan bızneske qoldaý baǵdarlamalary joq. Qazir aıyna shamamen 200 myń teńge tabamyn. Bul aqsha tek azyq-túlik pen páteraqyǵa jetedi. Óz páterimdi alý múmkin emes. Úsh balanyń anasy bolǵandyqtan, qosymsha kómekke zárýmin, biraq úshinshi toptaǵy múgedekterge jeńildik baǵdarlamalary qarastyrylmaǵan, - deıdi Elmıra Amanjolova
Elmıranyń oqıǵasy Qazaqstandaǵy múmkindigi shekteýli jandardyń basty máselelerin aıqyn kórsetedi. Qazirgi tańda mundaı adamdarǵa jumysqa ornalasý, kásipkerlikpen aınalysý, óz qabiletterin damytýǵa múmkindik alý ońaı emes. Estý qabileti tómen azamattar úshin arnaıy baǵdarlamalardyń joqtyǵy, jumys berýshilerdiń shekteýli túsinigi jáne qoǵamdaǵy qoldaý deńgeıiniń tómendigi olardy úlken qıyndyqtarǵa ákeledi.
Sonymen qatar, Qazaqstanda bul máselelerdi sheshýdiń áleýeti zor. Eńbek etemin degen jandar úshin arnaıy kýrstar, jeńildetilgen nesıe, kásibı baǵdar berý jáne jumys oryndaryn ashý baǵdarlamalary iske assa, olardyń da qoǵamǵa qosar úlesi arta túser edi. Árbir azamattyń eńbek etý quqyǵy bar, al qoǵamnyń mindeti – sol múmkindikke jol ashý. Eńbekke degen talpynysty qoldaý – memleket damýynyń mańyzdy kórsetkishi.