Prezıdent Qasym-Jomart Toqaev Ulttyq quryltaıdyń negizgi otyrysynda eń úzdik eńbek adamdaryn memlekettik deńgeıde ulyqtaý týraly bastama kóterdi, dep habarlaıdy Almaty-akshamy.kz QazAqparatqa silteme jasap.
«Qajetsiz mamandyq bolmaıdy, biliksiz maman bolady. Erinbeı eńbek etken jan óz isiniń maıtalmany atanady. Al, kásibin tolyq meńgergen adam qashanda suranysqa ıe bolady. Biz eńbek adamynyń mártebesin kóterýge basa mán beremiz. Elimizde túrli salanyń kásibı merekesi bar. Kóbinese mundaı meıramdar nazardan tys qalyp jatady. Meniń oıymsha, «Eńbek kúnine» oraı eń úzdik mamandardy memlekettik deńgeıde ulyqtaǵan jón. Bul qadam qoǵamda eńbek kúltin ornyqtyrýǵa jol ashady. Shyn máninde, qandaı jumys istep júrgeniń emes, ony qalaı istep júrgeniń áldeqaıda mańyzdy. Mınıstr nemese ákim bolsyn, qurylysshy, dáriger, muǵalim bolsyn, eń bastysy, árkim óz mindetin adal atqarýy kerek. Nanyn adal eńbekpen tabýy kerek», - dedi Prezıdent.
Qasym-Jomart Toqaev naǵyz eńbek adamy degenimiz kim dep paıymdaıtynyn aıtty.
«Bul, eń aldymen, ózine júktelgen mindetti oryndaý úshin baryn salyp eńbek etetin bilikti maman. Naǵyz eńbek adamy bul – istiń adamy, ıaǵnı ár isine, ár qadamyna jaýapkershilikpen qaraıtyn adal azamat. Al, jaýapsyzdyqtyń saldary nege aparyp soqtyratyny keshegi órt kezinde aıqyn kórindi. Osyndaı, keleńsiz jaǵdaılar tek orman sharýashylyǵynda emes, basqa da salada bar», - dedi Memleket basshysy.