Bedeldi baǵdarlama 1986 jyldan beri jumys isteıdi jáne Býndestagta tájirıbeden ótýge múmkindik beredi.
Nemis saıasatynyń «júregi» – Býndestagta taǵylymdamadan ótý – ekiniń birine berile bermeıtin múmkindik. Joǵary bilim, til bilýden basqa, saıasattaný syrttany bolý – shart. Bıyl irikteýge álemniń 33 elinen 96 adam qatysty, dep habarlaıdy Almaty-akshamy.kz 24.kz-ke silteme jasap.
Úzdikter qatarynda otandastarymyz Vıktorıa Pýlnıkova, Symbat Serikova jáne Nadıra Muhamedjan bar. Qyzdarymyz depýtattar búrosynda nemis demokratıasy úlgisimen jaqynyraq tanyspaq.
«Osy Germanıadaǵy saıası ómirdiń bir ereksheligi - depýtattar tek Berlınde jumys istemeıdi, olar taǵy da saılanǵan aımaqqa ár apta saıyn jıi-jıi baryp turady jáne sol jerde azamattarmen kezdesedi. Iaǵnı, azamattar men saılaýshylardyń depýtatpen baılanysy óte tyǵyz jáne kez kelgen ýaqytta sol aımaqtan adamdar mynda kele alady jáne depýtattarmen kezdese alady. Ýaqytyn belgilep, búroǵa ózderi kire alady. Iaǵnı, Germanıanyń kez kelgen azamaty ne úshin saılaǵanyn, kimge daýys bergenin ózi kóre alady», - deıdi IPS baǵdarlamasynyń stıpendıaty Nadıra Muhamedjan.
Nemis Parlamentinde 736 depýtat jumys isteıdi. Resmı sharalarmen qatar jergilikti turǵyndarmen kezdesý ádetki jumys josparyna enip ketken. Taǵylymdama aıasynda ár stıpendıat depýtattyń birine bekitilip, keńsede kómektesedi, tipti plenarlyq otyrystarǵa qatysa alady.
«Birinshi aıda teorıa, ıaǵnı Parlamenttiń qalaı jumys isteıtini týraly aıtylady. Meni eń qatty tań qaldyrǵany – koalısıa, ıaǵnı bul – 3 fraksıadan turatyn jáne olardyń basymdyqtary ártúrli partıalardan turatyn basqarýshy koalısıa. Býndestagda opozısıa da bar. Demokratıanyń eń mańyzdy núktesi, olar bir ústelge otyrady, tipti keıbir kelispeýshilik týyndasa da, orta tusyn taýyp, kelisýge tyrysady», - deıdi IPS baǵdarlamasynyń stıpendıaty Vıktorıa Pýlnıkova.
Taǵylymdamaǵa qatysýshylar jazda depýtattyń saılaý okrýgine saıahat jasamaq.
«Talqylaýlar barysynda halyq úshin tıimdi etý týraly óte qyzý pikirtalastar júredi. Germanıanyń saıası ómiriniń bir ereksheligi, depýtattar tek Berlınde ǵana jumys istemeıdi. Olar ózi saılanǵan týǵan okrýgine jıi barady. Jergilikti jurtpen kezdesedi. Iaǵnı, depýtat pen saılaýshylar arasyndaǵy baılanys óte tyǵyz», - deıdi IPS baǵdarlamasynyń stıpendıaty Symbat Serikova.
Stıpendıalyq baǵdarlama 5 aıǵa sozylady. Taǵylymdamadan keıin otandastarymyz elge oralyp, tájirıbesimen bólisýdi josparlap otyr.