Qazaqstanda qurylys salasyn e-Qurylys sıfrly júıesi arqyly qarqyndatyp, jumys tıimdiligin arttyrý josparlanyp otyr.
Bul týraly AMANAT partıasynda ótken Ekonomıka, kásipkerlik jáne agrarlyq sektor máseleleri jónindegi respýblıkalyq qoǵamdyq keńes janyndaǵy Aqparattyq-kommýnıkasıalyq tehnologıalar komıtetiniń kezekten tys otyrysynda Indýstrıa jáne ınfraqurylymdyq damý vıse-mınıstri Dınara Sheglova aıtty, dep habarlaıdy Almaty-akshamy.kz.
Mınıstrdiń orynbasary aıtqandaı, ekojúıeler táýekelderdi basqarýdyń biryńǵaı platformasyna jınaqtalyp, bul memlekettik basqarýdyń zamanaýı jáne tıimdi júıesin qurýmen qatar naqty derekter negizinde keshendi, ýaqytyly basqarý sheshimderin qabyldaýǵa múmkindik beredi.
«Jyljymaıtyn múlik nysandarynyń «ómirlik sıklin» jobalaý satysynan bastap ǵımaratty nemese belgili bir qurylysty buzýǵa deıin sıfrlandyrý - elimizdiń aýmaqtyq damýyn tıimdi, sapaly, strategıalyq jáne búdjettik josparlaýyn qamtamasyz etedi. Qazir qalalyq qurylys kadastry júıesinde salynyp bitken aýmaqtyń ınjenerlik jelileri týraly málimetterdiń 67,4% sıfrlandyryldy, sondaı-aq sıfrly bas jospardyń úlesi - 95,2%. Al dálme-dál josparlaý jobalary 91,7%-ǵa qamtylǵan. 2024 jyldyń sońyna qaraı bul kórsetkishti 100%-ǵa jetkizý josparlanyp otyr», - dedi D.Sheglova.
Jaýapty vedomstvonyń ókili zamanaýı sheshimder arqyly dálme-dál josparlaý jobalarynyń bekitilgen bas josparyna saı kelmeıtin 700-den astam faktisi anyqtalǵanyn jetkizdi. Bul rette júıede 2 myńnan astam paıdalanýshy jumys isteıtinin aıta ketý kerek.
Al qurylys kezeńderin e-Qurylys júıesi arqyly júzege asyrý kózdelip otyr. Atalǵan júıe 2022 jyldyń maýsymynda iske qosylyp, bul júıe qurylys prosesiniń barlyq qatysýshysyna (tapsyrys berýshi, merdigerler, avtorlyq jáne tehnıkalyq qadaǵalaýlar), sondaı-aq memlekettik organdarǵa óndiristik úderisti avtomattandyrýǵa septigin tıgizedi.
«Tyń sheshim arqyly respýblıkalyq 109 avtojoldyń qurylysy 100% júrgizilip keledi. Sonymen qatar atalǵan júıede 71 turǵyn úı nysany tirkelgen. Qazir munda 9643 tehnıkalyq jáne avtorlyq qadaǵalaý sarapshysy tartylyp otyr. Júıege 27 869 paıdalanýshy qosylǵan», - dedi mınıstrdiń orynbasary.
Mınıstrlik jol sektoryn sıfrlandyrýdy Jol aktıvterin basqarý júıesimen qamtyp keledi. Onyń maqsaty aqaýlardy der kezinde anyqtap, joıý arqyly avtojoldardy jóndeýge jumsalatyn shyǵyndardy ońtaılandyrý. Osylaısha, kúrdeli shyǵyndar azaıady dep boljanýda.
Bıyl osy júıeniń kómegimen respýblıkalyq mańyzy bar joldardyń barlyq uzyndyǵynyń 67%-na (2023 jyldyń sońyna deıin 100%) jol jamylǵysynyń aqaýlaryna baǵalaý júrgizý josparlanǵan.
Sonymen qatar mınıstrliktiń tarapynan joldardyń ashyq kartasynyń mobıldi qosymshasyn qurýǵa baılanysty jumys júrgizilip jatyr. Bul jol qozǵalysy qatysýshylaryna avtojoldardyń ahýaly jaıly, jol boıyndaǵy qyzmet kórsetý nysandarynyń ornalasqan jeri týraly, joldardyń aqyly ýchaskeleri jáne keri baılanysty ornatýǵa, sondaı-aq aýa raıy málimeti jóninde habardar bolýǵa múmkindik beredi. Mobıldi qosymshany iske qosý aldaǵy qarasha aıynyń sońyna josparlanyp otyr.