Qazaqstan boıynsha ataýly jalaqynyń ortasha máni bıylǵy IİI toqsanda 299 782 teńgeni qurady. Bul týraly Ulttyq statısıka búrosy málim etti, dep habarlaıdy Almaty-akshamy.kz Inbusiness.kz-ke silteme jasap.

2021 jyldyń tıisti toqsanyna qaraǵanda ósim - 23%, naqty mánde – 5,8% qurady.

Jalaqynyń medıanalyq máni (jalaqy qatarynyń ortalyq deńgeıi) 2022 jylǵy İIİ toqsanda baǵalaý boıynsha 189 018 teńgeni qurady.

Eńbek statısıkasy jáne ómir súrý deńgeıi departamentiniń dırektory Natalá Belonosova túsindirgendeı, aldyńǵy toqsanmen salystyrǵanda İİİ toqsandaǵy jalaqy deńgeıi ádette tómendep otyrady.

Bul úrdis jyl saıyn baıqalady jáne ekinshi toqsan ýaqytyna dóp túsetin maýsymdyq (demalys tólemderi, maýsymdyq jumystar) jaıttarǵa baılanysty.

"Ekinshi toqsanmen salystyrǵanda jalaqy deńgeıi 3,9 paıyzdyq tarmaqqa tómendedi (2021 jylǵy İİİ toqsandaǵy tómendeý – 3,1 paıyzdyq tarmaq). Mundaı ózgerister jyl saıyn baıqalady. Jalaqynyń ortasha mánin esepteý kezinde tabys salyǵy, zeınetaqy jáne basqa da áleýmettik aýdarymdar sıaqty tólemderdiń barlyq túri eskeriletinin atap ótkim keledi", – deıdi Natalá Belonosova.

Jalaqynyń ósýi qyzmettiń barlyq negizgi ekonomıkalyq túrleri boıynsha baıqaldy.

2021 jylǵy tıisti toqsanmen salystyrǵanda eń joǵary ósim – qurylys – 34,5%, aýyl, orman jáne balyq sharýashylyǵy – 31,3%, kólik jáne qoımalaý – 31,1% salalarynda baıqalady.

Al tómendeý kórsetiletin qyzmetterdiń ózge de túrlerin usynýda – 5,5%-ǵa jáne densaýlyq saqtaý men halyqqa áleýmettik qyzmet kórsetý salalarynda – 8,9%-ǵa baıqaldy.

Óńirlik bóliniste eń joǵary ósim Ulytaý oblysynda – 39%. Eń tómen ósim Astana qalasynda baıqaldy – 15,1%.