Sarapshylardyń boljamy boıynsha, aldaǵy 5 jylda qyzmetkerlerdiń daǵdylary men talaptardyń 40%-ǵa jýyǵy ózgeredi.
Jastardyń 34,1%-y mamandyqty óz betinshe tańdaıdy. Sarapshylardyń boljamy boıynsha, aldaǵy 5 jylda qyzmetkerlerdiń daǵdylary men talaptardyń 40%-ǵa jýyǵy ózgeredi. Bul týraly Eńbek jáne halyqty áleýmettik qorǵaý vıse-mınıstri Erjan Birjanov aıtty, dep habarlaıdy Almaty-akshamy.kz
Vıse-mınıstrdiń aıtýynsha, eńbek naryǵyna taldaý júrgizilgen. Soǵan sáıkes, nazar aýdarýdy talap etetin negizgi aspektiler aıqyndalǵan.
«Atap aıtqanda, jumyspen qamtylǵandardyń 15,2%-ynyń tek orta bilimi bar, túlekterdiń 40%-dan astamy mamandyq boıynsha jumys istemeıdi, jastardyń 34,1%-y mamandyqty óz betinshe tańdaıdy», – dedi vıse-mınıstr.
Osy máselelerdi sheshý úshin:
- bıznespen birlesip, kásiporyndar janyndaǵy oqý ortalyqtary bazasynda jappaı qaıta daıarlaýdyń, biliktilikti arttyrýdyń «fabrıkalaryn» qurý qajet. Jastardy suranysqa ıe mamandyqtarǵa oqytýǵa erekshe nazar aýdarý josparlanýda;
- suranysqa ıe daǵdylardy taný júıesin engizý. Memleket basshysynyń tapsyrmasy boıynsha Eńbekmıni «Kásiptik biliktilik týraly» zań jobasyn ázirledi. Onyń sheńberinde biliktilikti tanýdyń táýelsiz ortalyqtaryn qurý úshin tıimdi jaǵdaılar jasaý, jyl saıynǵy sertıfıkattaýdan ótý úshin izdenýshilerge keminde 1000 vaýcher usyný kózdeledi. Iaǵnı, bir rettik vaýcher negizinde jumyssyzdar keıinnen jumysqa ornalasý úshin óz biliktiligin rastaı alady;
- skills.enbek.kz platformasy arqyly jańa bilim men daǵdylardy ıgerý úshin jaǵdaı jasaý. Portal 2021 jyly jalpy el halqynyń bilim deńgeıi men kásibıligin arttyrý, mansaptyq damýdy yntalandyrý jáne «Ómir boıy oqytý» tujyrymdamasyn ilgeriletý maqsatynda iske qosyldy. Bul - Coursera sıaqty halyqaralyq onlaın oqytý platformalarynyń analogy;
- oqýshylar men jastar arasynda kásiptik baǵdarlaýdy uıymdastyrý úshin mansaptyq ilgerileý boıynsha keminde 100 nusqaýlyq ázirleý. Suranysqa ıe kásipter men perspektıvaly daǵdylardyń tizimi jyl saıyn jańartylyp otyrady.
Sonymen qatar, óńirlerde jumyspen qamtý kartalary qalyptastyrylmaq. Osylaısha, 2025 jylǵa deıin 2 mln-nan astam, onyń ishinde 600 myńnan astam turaqty jáne 1,4 mln-nan astam ýaqytsha jumys oryndaryn qurý josparlanǵan.
«Barlyq qurylǵan jumys oryndary "Jumys oryndaryn qurýdyń ıntegrasıalanǵan kartasy" aqparattyq júıesinde vızýaldanatyn bolady. Jergilikti atqarýshy organdardyń aldyna júıeni sapaly toltyrý mindeti qoıyldy. Eki aıdyń qorytyndysy boıynsha, shamamen 65 myń jumys orny nemese jyldyq jospardyń 15% (444,4 myń) quryldy, onyń ishinde 16 myńnan astamy turaqty», – dep habarlady Erjan Birjanov.
Vıse-mınıstr sondaı-aq bıyldan bastap memlekettik josparlaýdyń jańa júıesine sáıkes ekonomıkanyń basym salalary boıynsha ulttyq jobalardy iske asyrý bastalǵanyn, olardyń negizgi mindeti jumys oryndaryn qurý bolyp tabylatynyn atap ótti. Óz sóziniń sońynda spıker Eńbek mınıstrligi jańa trendterge sáıkes halyqty jumyspen qamtý salasyn sıfrlandyrý boıynsha júıeli jumys júrgizip jatqanyn atap ótti.
«Negizgi maqsat – bıznes-úderisterdi tolyǵymen qaıta qaraý, proaktıvti formatqa kóshýdi júzege asyrý. Ol úshin biz biryńǵaı sıfrlyq ekojúıeni quratyn bolamyz, oǵan mynadaı servıster kiredi: Elektrondyq eńbek bırjasy – enbek.kz, qysqa merzimdi onlaın kýrstar portaly – skills.enbek.kz, frılanserler úshin jumys izdeý qyzmeti – freelance.enbek.kz, eńbek sharttaryn esepke alýdyń elektrondyq júıesi – ehr24.kz, kásipkerlikti damytý sharalaryn kórsetý jónindegi avtomattandyrylǵan júıe – business.enbek.kz. Bul servısterdi Eńbekmıni «Eńbek resýrstaryn damytý ortalyǵy» AQ mamandarymen birlesip derbes ázirleıdi», – dep qorytyndylady Erjan Birjanov.