Otandyq óndirýshiler suranystyń tek 4,2%-yn ǵana qanaǵattandyrǵan, ıaǵnı, búkil naryq ımportqa táýeldi.
Bir jyl ishinde balalar aıaq kıimi 14,2%-ǵa, áıelder aıaq kıimi 8,8%-ǵa, erler aıaq kıimi 7,9%-ǵa qymbattady, dep habarlaıdy Almaty-akshamy.kz Energyprom.kz saıtyna silteme jasap.
Bir jylda Qazaqstanda aıaq kıim 10%-ǵa qymbattaǵan. 2022 jyldyń qańtar-mamyr aılarynda Qazaqstanda 546 myń jup aıaq kıim shyǵarylǵan. Bul byltyrǵy kórsetkishten 13,3% az. Óńirler arasynda bul kórsetkish boıynsha Almaty qalasy alda tur - 253,3 myń jup aıaq kıim óndirilgen. Odan keıin Jambyl (73,4 myń jup) jáne Almaty (57,9 myń jup) oblystary tur.
«Otandyq óndirýshiler 2022 jyldyń birinshi toqsanynda halyq suranysynyń tek 4,2%-yn ǵana qanaǵattandyrǵan. Iaǵnı, búkil naryq ımportqa táýeldi deýge bolady. Qańtar-naýryz aralyǵynda elge syrttan 6,9 mln jup aqkıim ákelingen. Bir qýantarlyǵy, bul kórsetkish 2021 jylǵydan 2,6 ese az», - dep jazylǵan saıtta shyqqan aqparatta.
2022 jyldyń mamyr aıyndaǵy qorytyndy boıynsha, aıaq kıim baǵasy 9,7% ósken. Keıingi 4 jylda birinshi ret osyndaı qymbatshylyq baıqalyp otyr. Óńirlerdegi qymbattaý deńgeıi ár túrli. Qostanaı oblysynda 4,9% bolsa, Mańǵystaý oblysynda 19,5% ósken. Bir jyl ishinde bárinen buryn balalar aıaq kıimi 14,2%-ǵa, áıelder aıaq kıimi 8,8%-ǵa, erler aıaq kıimi 7,9%-ǵa qymbattady.