Neke týraly ózgerister.
Azamattyq hal aktilerin memlekettik tirkeýdi uıymdastyrý, azamattyq hal aktileri jazbalaryna ózgerister engizý, qalpyna keltirý, joıý qaǵıdalaryna ózgerister engizildi, dep habarlaıdy Almaty-akshamy.kz QazAqparat saıtyna silteme jasap.
Qujat boıynsha, endi azamattyq hal aktilerin tirkeý qyzmetin alý úshin azamattar jeke basyn kýálandyratyn qujattyń elektrondy nusqasyn usyna alady.
Dálirek aıtsaq, nekeni tirkeý, neke jasyn tómendetý, nekeni buzý, 16 jasqa deıingi balalarǵa týý týraly qaıtalama kýálikterdi berý, týýdy tirkeý, aty-jónin ózgertýdi tirkeý, azamattyq hal aktileri jazbalaryn qalpyna keltirý jáne joıý, azamattyq hal aktilerin tirkeý týraly qaıtalama kýálikterdi nemese anyqtamalardy berý rásimderi elektrondy jeke kýálik arqyly da iske asyrylady.
«Nekege turýǵa nıet bildirgen adamdar neke qıýdy (erli-zaıypty bolýdy) tirkeýdiń belgilengen kúni jeke basty kýálandyratyn qujatpen nemese sıfrlyq qujattar servısinen elektrondyq qujatpen tirkeýshi organǵa kelýi qajet. Eger nekege otyrýǵa (erli-zaıypty bolýǵa) tilek bildirýshiler dáleldi sebeptermen belgilengen kúni tirkeýshi organǵa kele almasa, neke qıýdy (erli-zaıypty bolýdy) memlekettik tirkeý merzimi olardyń ótinishi boıynsha basqa ýaqytqa aýystyrylady. Belgilengen kúni nekege (erli-zaıyptylyqqa) otyratyn adamdar ne olardyń bireýi dálelsiz sebeptermen kelmegen jáne nekeni (erli-zaıyptylyqty) tirkeý merzimin uzarta otyryp, ótinish týraly aryz bolmaǵan jaǵdaıda ótinish joıylýy tıis», - delingen buıryqta.
Nekeni buzǵysy keletin erli-zaıyptylar tirkeýshi organǵa jeke basyn kýálandyratyn qujatpen nemese belgilengen kúni sıfrlyq qujattar servısinen alynǵan elektrondyq qujatpen kelýi kerek.
«Nekeni (erli-zaıyptylyqty) buzǵysy keletin erli-zaıyptylar nekeni (erli-zaıyptylyqty) buzýdy tirkeý úshin belgilengen kúni jeke basyn kýálandyratyn qujatpen nemese sıfrlyq qujattar servısinen elektrondyq qujatpen tirkeýshi organǵa kelýi qajet. Júrgizilgen tekserý nátıjeleri boıynsha laýazymdy tulǵa derekterdi Azamattyq hal aktlerin jazýdyń aqparattyq júıesine ótinish berilgen kúnnen bastap 1 (bir) aı ótkennen keıin erli-zaıyptylardyń ekeýiniń qatysýymen engizedi», - dep jazylǵan qujat mátininde.
Bul buıryq 2021 jylǵy 5 qyrkúıekten bastap kúshine enedi.