2021 jylǵy qurǵaqshylyq aýyl sharýashylyǵy óniminiń shyǵymyn 2,4%-ǵa tómendetti
Qazaqstan 2030 jylǵa deıin josparlanǵan agroónerkásiptik keshen ónimderiniń eksporty kólemin tómendetpek. Bul týraly «Ashyq» NQA portalynda jarıalanǵan Úkimet qaýlysynda kórsetilgen, dep habarlaıdy Almaty-akshamy.kz QazAqparatqa silteme jasap.
«Úzdiksiz pandemıa jaǵdaıynda búkil álemde ekonomıkalyq ósý qarqynynyń baıaýlaýy baıqalady. Shekaralardyń jabylýyna baılanysty elder arasyndaǵy syrtqy saýda qatynastary tómendedi jáne pandemıaǵa deıingi saýda qatynastary qashan qalpyna keletini belgisiz. Osyǵan baılanysty, agroónerkásiptik keshen óniminiń eksportyn 1,5 esege ulǵaıtýǵa (3 ese josparlanǵan - red.) ózgertý, qaıta óńdelgen ónimniń úlesin 50%-ǵa deıin jetkizý usynylady. Sondaı-aq, 2021 jylǵy qurǵaqshylyq aýyl sharýashylyǵy óniminiń shyǵymyn 2,4%-ǵa tómendetti, bul eksporttyq pozısıalardyń ósýine de keri áserin tıgizdi», - delingen qujatta.
Buǵan deıingi josparǵa sáıkes, agroónerkásiptik keshen ónimderiniń eksportyn 2020 jylmen salystyrǵanda 2030 jylǵa deıin 3 ese ulǵaıtý kózdelgen edi. 2030 jyly eksport mólsheri 9,9 mlrd dollarǵa jetýi tıis bolatyn. Al endi jańa ózgeriske saı, onyń kólemi aldaǵy 8 jylda 6,6 mlrd dollar bolady.
«Aýyl sharýashylyǵy salasyndaǵy ınvestısıalyq jobalardy qarjylandyrý jáne eksportqa baǵdarlanǵan qaıta óńdelgen ónimniń qosymsha óndirisin quratyn tehnıkany satyp alý úshin 2022 jyldan bastap «Báıterek» UBH» AQ-nyń jarǵylyq kapıtalyn 780 mlrd teńgege ulǵaıtý kózdelgen. Bul rette búdjetten tek 79 mlrd teńge, ıaǵnı 2023 jyldan bastap tehnıka satyp alýǵa jáne 2024 jyldan bastap ınvestısıalyq jobalardy kredıtteýge qoldaý kórsetildi. Bul rette bıznes pen bank sektory eksportqa baǵdarlanǵan ınvestısıalyq jobalardy qurýǵa osyndaı qarajat kólemin qarjylandyrýǵa daıyn emes», - dep kórsetilgen qaýlyda.
Qujatty ashyq talqylaý keler jyldyń 6 qańtaryna deıin jalǵasady.