«Shapaǵat» áleýmettik qyzmet ortalyǵyna bıyl 10 jyl toldy. Osy mereıli kúnge oraı Almatyda «Shapaǵat» – shattyq mekeni» atty merekelik konsert ótti.
Merekede áleýmettik qyzmetkerlerdiń ózderi án salyp, bı bıledi. Olardyń «Bizge búgin 10 jyl» áni kóńilderden shyǵyp, ystyq yqylasqa bólendi. Tipti, «Shapaǵattyń» shapaǵatyn kórip, sezinip júrgen, qolarbada otyrǵan baldyrǵandardyń ózderi de merekeni án-jyrmen órnektedi.
Ortalyqtyń qyzmetkerleri men balalar birigip jasaǵan túrli buıymdar da kórmege qoıylyp, kóptiń kózin qýantty. Al fotokórme balalardyń túrli kezeńde, túrli is ústinde, sabaq kezinde túsken sýretterimen kómkerildi.
Qaı kezeńde de, qaı elde bolmasyn, urpaq tárbıesi – baǵdarly bolashaqtyń bastaýy. Táýelsizdigine táýbe etip, Máńgilik el bolýdy murat tutqan halqymyzdyń rýhanı baı dúnıesiniń ólshemi men óresi de osy bala densaýlyǵynda, bala tárbıesinde jatyr. Osy oraıda, múmkindigi shekteýli balalardy qoǵamǵa kiriktirip, ortaǵa beıimdeýdi ustanym qylǵan «Shapaǵatqa» ata-analardyń aıtar alǵysy da sheksiz. Sebebi, olarǵa memleket «dimkás balańyzdy biz qarap bereıik, siz kúni boıy alańdamaı jumysyńyzdy istep, tabys taýyp, muqtajdyq kórmeńiz» dep jaǵdaı jasap otyr. Atalǵan ortalyqqa ata-analar balalaryn tańerteń ákelip tastaıdy, keshke alyp qaıtady. Dálirek aıtsaq, olardy arnaıy «Invataksı» tasymaldaıdy.
«Shapaǵatty» merekesimen quttyqtaǵan Almaty qalasy Jumyspen qamtý jáne áleýmettik baǵdarlamalar basqarmasynyń basshysy Názıra Toǵyzbaeva qandaı jaǵdaıda da tózimdi, sabyrly, kóp otbasynyń aýyrtpalyǵyn bir kisideı kóterisip, jeńildetýge úles qosyp júrgen áriptesterine iltıpatyn jetkizdi. Aldaǵy ýaqytta da tolaǵaı tabystar tiledi.
«Shapaǵat» áleýmettik qyzmet ortalyǵynyń beldi mamandary keýdesine merekelik medal taqty. Búginde zeınettik demalysta júrgen burynǵy qyzmetkerler de ortaǵa shaqyrylyp, olar da alǵys hatqa ıe boldy.
«Shapaǵat» áleýmettik qyzmet ortalyǵynyń dırektory Nurzıa Álimbekovanyń sózine súıensek, búginde ortalyqtan 1,5–18 jas aralyǵyndaǵy múmkindigi shekteýli balalar men 18–35 jas aralyǵyndaǵy múgedek jandar qyzmet alady. Olardyń jalpy sany – 265. «Shapaǵat» kópsalaly ońaltý ortalyǵynyń ereksheligi – barlyq úlken-kishi qyzmet alýshylarǵa medısınalyq, áleýmettik, pedagogıkalyq kásibı qyzmetter kórsetiledi.
• Taqyrypqa oraı
Bıtan SÁLİMBAEVA, zeınetker:
Balalardy jaqsy kóremin
– Qazir eńbek demalysyndamyn. Osy ortalyqta jumys istegen kúnderimdi saǵynamyn. Mundaı ortalyqta jumys isteý ońaı emes, ol úshin úlken júrek, meıirim, tózim kerek. Sebebi densaýlyǵynda kináraty bar, júıke aýrýyna shaldyqqan balaqaılardy qaraý, bárine ıe bolý qıyn ǵoı. Biraq bárimen til tabysýǵa, kóńil bólýge tyrysatynbyz. Qazir de solaı ekeni sózsiz. Men balalarǵa eńbek sabaǵynan dáris berdim. Olardyń dıagnozdaryna qaraı, beti-qolyn jýýdy, óz kıimin kıýdi, túımelenýdi, qasyq ustaýdy, ydys jýýdy, úı jınaýdy, jalpy, kúndelikti ómirge qajetti qarapaıym daǵdylardy úırettim. Balalardy shyn nıetińmen jaqsy kórseń, olar jylylyqty sezinedi. Men barlyq balany jaqsy kórdim.