Bul jóninde OSK hatshysy «Adamı ólshem jónindegi dıalog alańynda» ótken referendým taqyrybyna qatysty otyrysta málim etti, dep habarlaıdy Almaty-akshamy.kz 24.kz-ke silteme jasap.
Qazaqstan Syrtqy ister mınıstrligi janyndaǵy «Adamı ólshem jónindegi dıalog alańy» konsýltatıvtik-keńesiniń kezekten tys otyrysynda elimizdiń qazirgi saıası kún tártibindegi eń iri másele – 5 maýsymǵa ótetin QR Konstıtýsıasyna ózgerister men tolyqtyrýlar engizý týraly jalpyulttyq referendým taqyryby qaraldy. İs-shara QR SİM Erekshe tapsyrmalar jónindegi elshisi Úsen Súleımenniń tóraǵalyǵymen ótti. Onyń aıtýynsha, azamattardyń aldaǵy daýys berýdiń mańyzdylyǵyn jáne Konstıtýsıaǵa usynylǵan túzetýler qabyldanǵan jaǵdaıda, jańartylǵan Konstıtýsıa negizinde qazirgi qoldanystaǵy basqa da zańnamalyq aktilerge túzetýler engiziletinin nemese jańa zańdar qabyldanbaq.
Referendýmnyń mazmuny men oǵan daıyndyq prosesi jóninde QR Ortalyq saılaý komısıasynyń hatshysy Muhtar Erman men QR Ádilet mınıstrliginiń Zańnama departamentiniń dırektory Nazken Jamaladın baıandama jasady. OSK hatshysy otyrysqa qatysýshylardy óz organnyń jáne 10 012 ýchaskelik komısıanyń daýys berýge daıyndyq barysymen tanystyrdy. Ádilet mınıstrliginiń ókili Konstıtýsıaǵa engiziletin túzetýlerdiń mazmunyna egjeı-tegjeıli toqtaldy.
Aıta keteıik, otyrys beınekonferensıa rejıminde ótti. Oǵan Parlament depýtattary, QR Prezıdenti janyndaǵy Adam quqyqtary jónindegi komısıanyń hatshysy, Joǵarǵy sottyń, Konstıtýsıalyq keńestiń, QR Adam quqyqtary jónindegi ýákil keńsesiniń, múddeli mınıstrlikterdiń, adam quqyqtaryn qorǵaý salasynda belsendi úkimettik emes uıymdardyń ókilderi qatysty.