Referendýmnyń kóptegen mańyzdy aspektileri bar
Almatyda Halyqaralyq aqparattyq tehnologıalar ýnıversıtetinde (HATÝ) «Qazaqstandaǵy respýblıkalyq referendým» atty dóńgelek ústel ótti, oǵan qoǵam men BAQ ókilderi, sarapshylar, ýnıversıtettiń profesorlyq-oqytýshylar quramy men stýdentteri qatysty, dep habarlaıdy Almaty-akshamy.kz.
Sharany ashqan Basqarma tóraǵasy, HATÝ rektory Asqar Hıkmetov aldaǵy referendým elimizdiń tarıhyndaǵy jańa kezeń bolatynyn atap ótti.
«Referendýmnyń kóptegen mańyzdy aspektileri bar, saıası júıe túbegeıli ózgerýde. Biz halyq bıligin nyǵaıtýdyń, jańa azamattyq qoǵamdy qalyptastyrýdyń, Parlamenttiń rólin arttyrýdyń jáne basqa da kóptegen túbegeıli ózgeristerdiń naǵyz demokratıalyq jáne durys jolyn kórip otyrmyz. Al eń bastysy, Konstıtýsıaǵa ózgertýler men tolyqtyrýlar jalpyhalyqtyq, demokratıalyq jolmen, jalpyhalyqtyq referendým arqyly qabyldanady – azamattar bul tarıhı jáne el bolashaǵy úshin mańyzdy oqıǵaǵa qatysa alady. Árkimniń daýysy mańyzdy!», - dep túıindedi rektor Asqar Hıkmetov.
Sharada sóz alǵan baıandamashylar júrgizilip jatqan konstıtýsıalyq reformanyń mánin, Ata zańymyzdaǵy baptardyń úshten birine engizilip jatqan ózgeristerdi, Ekinshi Respýblıkany qurý jolyn tilge tıek etti. Jıynda reformalar qordalanǵan máselelerdi sheshýge jáne qoǵamdy odan ári demokratıalandyrýǵa, memlekettilikti nyǵaıtýǵa baǵyttalǵany aıtyldy. Referendým elimizdiń saıası ómirindegi betburys kezeńi, Jańa Qazaqstandy qurýdaǵy mańyzdy qadam bolatyny basa aıtyldy.
Dóńgelek ústel barysynda qatysýshylar ózara pikir almasyp, stýdentter ózderin tolǵandyrǵan suraqtaryna jaýap ala aldy. Jıyn sońynda spıkerler jastar men stýdentterdi Memleket basshysy Qasym-Jomart Toqaevtyń Konstıtýsıalyq reformany júzege asyrý jónindegi bastamalaryn qoldaýǵa, 5 maýsymda ótetin referendýmǵa belsendi túrde qatysyp, óz tańdaýyn jasaýǵa shaqyrdy.