Ekibastuzda apat saldarynan zaqymdalǵan 50 shaqty páter anyqtaldy. Bul úılerdi dúısenbiden bastap retke keltirý úshin brıgadalar jumysqa kirisedi, dep habarlaıdy Almaty-akshamy.kz Inform.kz-ke silteme jasap.
«Ákimdik qyzmetkerlerimen birge páterlerdi aralap shyqtyq. Apat saldarynan barlyǵy zaqymdalǵan elý shaqty páter anyqtaldy. Bul úılerge dúısenbiden bastap brıgadalar kirip, adam turatyndaı jaǵdaıǵa keltiredi. Qalǵan ótinishter toptastyrylǵannan keıin jumys bastalady. Eger de komısıa turmystyq tehnıka apat saldarynan isten shyqqanyn rastasa, shyǵynnyń óteletindigine úmit artýǵa bolady», — dedi «OAEK» AQ basqarma tóraǵasynyń orynbasary Leonıd Ianýshko baspasóz konferensıasynda.
Ekibastuz qalasynyń ákimi Aıan Beısekınniń aıtýynsha, barlyq zardap shekken páterler boıynsha jeke tizim jasalýda. Ol úshin jeti mekenjaı boıynsha ótinishterdi qabyldaıtyn arnaıy pýnktter ashylǵan. Budan bólek, ákimshilikte zardap shekken azamattardyń shaǵymdaryn qabyldaıtyn pýnkt bar.
«Bul máselege qatysty «OAEK» AQ basshylyǵymen kelissózder júrgizilgen. Sondyqtan da jalǵan aqparat bolmaýy tıis. Mindetti túrde jóndeý jumystary júrgiziledi. Aqaýlardy anyqtaıtyn 70 adamnan turatyn jeti brıgada qurylǵan. Turǵyndardyń ózderi jóndeýdi bastaǵan jaǵdaılar da bar. Ol úshin chekterdi usyný qajet. Mundaı jaǵdaıda komısıa teksergennen keıin shyǵyn óteledi», — dedi Aıan Beısekın.