Astana mańynda strategıalyq nysandy qorǵaýǵa arnalǵan arnaıy taktıkalyq oqý-jattyǵýlar ótti.
Qorǵanys vedomstvosynyń josparyna sáıkes, 99255 áskerı bóliminiń aýmaǵynda ótken jattyǵýlarǵa 70 áskerı mindetti qatysty. Aýmaqtyq qorǵanys quramasy áskerı qyzmetshileriniń negizgi mindeti dıversanttardyń strategıalyq obektiniń aýmaǵyna kirýine jol bermeý boldy.
Jıynǵa elordadan shaqyrylǵan áskerı mindettilerge dalalyq oqytý men úılesimdiliktiń teorıalyq jáne praktıkalyq kýrsy, onyń ishinde atys daıyndyǵy jattyǵýlary ótkizildi. Mundaı oqý-jattyǵýlar jylyna eki ret – kúz ben kóktemde ótip turady.
– Bul jerde oqý-jattyǵýdyń belsendi kezeńi ótti, – deıdi Astana ákiminiń áskerı qaýipsizdik jáne qorǵanys máseleleri jónindegi kómekshisi podpolkovnık Meıram Elshibaev. – Senarıge sáıkes, terrorıster toby aýmaqtyq qorǵanys batalóny kúzetetin strategıalyq nysandy basyp alýǵa áreket etedi. İs-shara Tótenshe jaǵdaılar jáne İshki ister mınıstrlikteriniń bólimshelerin tarta otyryp, qala ákimdiginiń qoldaýymen ótkizildi.
Áskerı mindetti serjant Marat Oralbekov jıyndy rota serjanty laýazymynda ótýde. Jeke quram 10 kún boıy oqý-taktıkalyq daıyndyqpen aınalysyp, atys alańyna shyqty.
– Munaı bazasyn kúzetý kezinde dıversanttardy toıtarýdaǵy taktıkalyq daıyndyq sátti ótti, – deıdi ol.
Aqtóbe oblysynda «Bóget-2023» jattyǵýy aıaqtaldy. Munda aýmaqtyq qorǵanys quramasy kúzet rotasynyń bógetti zańsyz qarýly toptardyń yqtımal dıversıalarynan qorǵaýǵa daıyndyǵy tekserildi.
«Bóget-2023» taktıkalyq-arnaıy jattyǵýlarynyń qorytyndy kezeńin ótkizý úshin Aqtóbe sý qoımasy tańdap alyndy. Oǵan Aqtóbe qalasynan 78 áskerı mindetti qatysty.
Júrgizilgen manevrlerdiń negizgi taqyryby «Aýmaqtyq qorǵanys quramasy kúzet rotasynyń bólingen kúshtermen jáne quraldarmen birlese otyryp, zańsyz qarýly quralymdy joıýda arnaıy áskerı is-qımyldardy júrgizýi» boldy. Jattyǵý aıasynda áskerı qyzmetshiler atys qarýy men granata atqyshtardy paıdalandy.
Elimizdiń birqatar óńirinde ótip jatqan jattyǵýlardyń mańyzdy quramdas bóligi ártúrli qurylymdarǵa tıesili kúshter men quraldardyń, onyń ishinde aýmaqtyq áskerler quramasynyń, Polısıa departamentiniń, Ulttyq ulan men Tótenshe jaǵdaılar departamenti bólimsheleriniń ózara belsendi is-áreketi boldy.