Buǵan deıin de bıylǵy Qurban aıt merekesiniń onlaın rejımde ótip jatqanyn habarlaǵanbyz.
Almaty qalasynyń Din isteri basqarmasy musylmandardan Qurban Aıt merekesin toılaý kezinde shekteý sharalaryna túsinistikpen qaraýdy ótindi, dep habarlaıdy Almaty-akshamy.kz
Eske salsaq, bıyl karantın men juqtyrǵandar sanynyń ósýine baılanysty ǵıbadat etýge ári qurbandyq shalý oryndarynda adam kóp bolýyna tyıym salyndy.
Almaty qalasy Din isteri basqarmasy basshysynyń orynbasary Erǵalı Kósheke azamattardan qaladaǵy epıdemıologıalyq jaǵdaıdy eskerýge ári qurban shalý ornyna kelmeýge, úıde namaz oqyp, merekeni shaǵyn otbasylyq ortada atap ótýge shaqyrdy.
«Almatyda koronavırýsqa baılanysty jaǵdaı kún saıyn nasharlaýda. İndet kezeńin kez kelgen dindar adam ıslam dini talap etkendeı danalyq, kishipeıildilikpen qabyldaýy kerek. Bizdiń ortaq mindetimiz merekeni jaıly, qaýipsiz ótkizý. Halyqtyń densaýlyǵy qazir bárinen de mańyzdy», – dedi Din isteri basqarmasynyń ókili Erǵalı Kósheke.
Qazirgi ýaqytta qurban2021.kz. saıty arqyly ótinish bergenderdiń atynan ımamdar, meshit qyzmetkeri men eriktiler soıý oryndarynda bolyp, qurbandyq shalý rásimderin qashyqtyqtan ótkizedi.
Qurbandyq eti qazirdiń ózinde taratylyp, muqtaj otbasylardyń úılerine jetkizilýde.
«Saǵat 10-daǵy málimet boıynsha, 800-den astam adam qurbandyqqa shalynǵan maldyń etin alýǵa ótinish berdi. 50 qoı men iri qara qurbandyqqa shalynyp, 225 otbasyna et jetkizildi. Barlyq rásim sanıtarlyq-epıdemıologıalyq normalardy saqtaı otyryp, jumyldyrylǵan adamnyń eń az qatysýymen ótedi», – dedi Erǵalı Kósheke.
Sonymen qatar, Almatydaǵy epıdemıologıalyq jaǵdaıdyń kúrt shıelenisýine baılanysty qala meshitterinde Qurban aıt merekesine arnalǵan duǵalar oqylmaıdy. Musylmandarǵa úıde eki rákat namaz oqý usynyldy.
Sóz sońynda basqarma ókili taǵy da barlyq dindarlardy ózderiniń áreketterin shekteýge, qonaqqa barmaýǵa, buqaralyq is-shara ótkizbeýge shaqyrdy.
Aıta ketsek, ótken táýlikte Almatyda koronavırýs juqtyrǵandardyń jalpy sanyna (63 myńnan astam adam) taǵy 629 adam qosyldy. Ótken aptada naýqastardyń kúndelikti ósýi tirkeldi. 18 shilde kúni táýliktik ósim 798 adamǵa jetti.