Londonda aǵylshyndar qazaqsha úırenip jatyr.
Olardyń ana tilimizge degen mahabattyn súıikti ánshisi Dımash Qudaıbergen oıatqan. Sálemdesýden bastap, qoshtasýǵa deıin, tipti, qazaq tilinde án aıtýdy da biledi, dep habarlaıdy Almaty-akshamy.kz QazAqparatqa silteme jasap.
21 aqpan - Halyqaralyq ana tili kúni qarsańynda Qazaqstannyń Ulybrıtanıadaǵy elshiliginiń uıymdastyrýymen áserli kesh ótti.
Oǵan «Dımash Qudaıbergen. Ulybrıtanıa jáne dúnıejúzi» fan-klýbynyń belsendi músheleri qatysty.
Barlyǵyn dala daýsymen dúnıeni dúr silkindirgen dúldúl ánshimizdiń ónerine degen mahabbat biriktiredi.
Aralarynda Qazaqstanǵa saıahattaǵandar kóp. Baı mádenıetimizden, salt-dástúrlerimizden jáne ulttyq taǵamdarymyzdan da jaqsy habardar.
«Men negizi bala kútimi boıynsha kolej stýdentterine leksıa oqımyn. Fan-klýbymyzdy 2022 jyldyń tamyzynda ashtyq, bar bolǵany 6 aı ótti. Kúni keshe 1 000-shy múshemiz qatarymyzǵa qosylyp, qatty qýandyq»,- deıdi fan-klýb tóraıymy Djıll Bıchem.
«Qulaǵymdaǵy syrǵa men moınymdaǵy alqany Almatyǵa Dımashtyń konsertine barǵanda satyp aldym. Tereza qurbym ekeýmiz kólge bardyq, shatqaldardy da kórdik. Óte tamasha ýaqyt ótkizdik»,- deıdi fan-klýb múshesi Lýanna Kıpıng.
Uly Abaı tiline degen qyzyǵýshylyǵyn aǵylshyndar ǵana emes, ýels, portýgal, pákistan, evreıler de tanytýda. Ustazy - on jasar qazaq qyzy Káýsar Ǵalymjanqyzy.
Ol - bastaýysh mekteptiń oqýshysy. Ata-anasymen Londonda ýaqytsha turyp jatyr.
Qos tilge jetik búldirshin buǵan deıin qazaqstandyq «Balapan» telearnasynda balalarǵa aǵylshynsha úıretip, tájirıbe jınaqtaǵan.
Endi, mine, ulttyq kıim kıip, brıtanıalyqtarǵa qazaq tiliniń ǵajaptyǵyn tanytýda.
«Men qazaqsha sálemdesip, jaǵdaı suraı alamyn. Ózimdi tanystyra alamyn», - deıdi til úırenýshi Krıstına Breın.
«Qazaqstannyń mádenıetine, tiline tántimin. Halqy da keremet. Biz osy fan-klýbqa múshe bolǵanymyzǵa qýanamyz. Dımash barlyǵymyzdy úlken shańyraq astynda biriktirdi. Biz uıyǵan bir otbasyndaımyz»,- deıdi onyń qurbysy Tereza Neves.
Bul kúni Halyqaralyq fan-klýb músheleri qaıyrymdylyq sharasyn da ótkizdi.
Qazaqstandaǵy «SOS balalar aýyly» úkimettik emes qoǵamdyq uıymyna qarajat jınap berdi.
Ol aqshaǵa jetim nemese ata-anasynyń qaraýynsyz jáne qamqorlyǵynsyz qalǵan balalar mýzykalyq aspaptar satyp ala alady. Qazaqtyń dástúrli dombyrasynda oınap úırenýge múmkindik alady.
«Biz ázirge 1 mln teńge jınadyq. Naýqan áli de jalǵasyp jatyr. Bul soma eselene túsedi dep senemiz. Bolashaqqa qurǵan birqatar josparlarymyz bar. Aldaǵy ýaqytta «SOS balalar aýylynyń» tárbıelenýshilerine onlaın platforma arqyly aǵylshyn tilin úıretkimiz keledi. Sondaı-aq sol aýylǵa baryp, oqytatyn muǵalimderge aqsha tóleý de oıymyzda bar»,- deıdi fan-klýb tóraıymy Djıll Bıchem.
Halyqaralyq ana tili kúni qarsańynda ótken keshte túrli ult ókilderi óz tilderinde óleńder oqydy.
Dımashtyń shyǵarmashylyǵyna qatysty tanymdyq suraqtarǵa jaýap berdi.
Estelik syılyqtarǵa ıe boldy. Óner juldyzynyń repertýaryndaǵy qazaqsha ánderdi oryndady.
Dımash Qudaıbergenniń bes jylǵa jýyq ýaqyt buryn Londonda konsert bergeni belgili. Jankúıerleri súıikti ánshisin Ulybrıtanıaǵa taǵy shaqyrdy.