Belgili jyrshy Dımashqa ataq berý máselesin kóterdi
Belgili jyrshy, fólklortanýshy ǵalym Berik Júsipov ánshi Dımash Qudaıbergenge «Qazaqstannyń Eńbek Eri» ataǵyn berýdi usyndy, dep habarlaıdy Almaty-akshamy.kz
Bul týraly jyrshy óziniń áleýmettik jelidegi paraqshasynda jazdy.
Onyń sózinshe, erekshe jetistigi úshin beriletin altyn juldyz Dımash Qudaıbergenniń keýdesinde jarqyraý kerek. Jer júziniń tyńdarmandaryna tańdaı qaqtyryp, tamsandyrǵan teńdesi joq qubylysty der kezinde baǵalaı almaı otyrǵan bizdiń áreketimiz – qylmys, - deıdi ol.
«Qazaqstanǵa sińirgen erekshe jetistigi úshin beriletin «Qazaqstannyń Eńbek Eri» degen ataq bar. Osy altyn juldyz Dımash Qudaıbergenniń keýdesinde jarqyraý kerek. Iá, ony «áli jas qoı» deıtinder de tabylady. Joq, keshirińiz, Dımash jas emes, tipti jas bolyp ta kórgen emes. Kerisinshe, óner arqyly qazaqty dúnıe júzine tanytýdyń jolyn tapqan, jer júziniń tyńdarmandaryna tańdaı qaqtyryp, tamsandyrǵan teńdesi joq qubylysty der kezinde baǵalaı almaı otyrǵan bizdiń áreketimiz – qylmys! Keńes Odaǵy qalyptastyrǵan sana stereotıpterin kúl-parsha etetin ýaqyt jetti. Shyn máninde, bul ataǵyńa Dımash zárý emes, qaıta álginiń dárejesin kótere túsý úshin Dımash sol ataǵyńa kerek. Qazir álemde Dımashtyń esimi qazaq degen sózdiń sınonımi ári sımvoly retinde qabyldanady. Bul degeniń ǵajap qoı, biz sekildi az ultqa odan artyq ne kerek? Siz qalaı oılaısyz, otandas?» – dep jazady ol.