Májilis depýtattary áleýmettik jeli men aqparattyq keńistikte LGBT taqyrybyndaǵy nasıhatqa tyıym salý týraly bastamany qaıta kóterdi, dep habarlaıdy Aqsham.news.
Usynys muraǵat isi máselelerine arnalǵan zań jobasyna engizilmek. Depýtat Natalá Dementevanyń aıtýynsha, túzetý dástúrli emes jynystyq qatynastardy jarnamalaý men nasıhattaýǵa shekteý qoıýdy kózdeıdi.
“Bul ózgeris áleýmettik jelilermen qatar, fılmder men jarnamalarǵa da qatysty. Balalar mundaı mazmundaǵy kontentti ashyq kórmeýi tıis”, – dedi depýtat.
Onyń aıtýynsha, qazirgi tańda áleýmettik jelilerde LGBT qatynastaryn “qalypty qubylys” retinde kórsetetin beınematerıaldar men jazbalar jıi kezdesedi.
“Qazir toqtatpasaq, Batystaǵydaı jaǵdaıǵa jetýimiz múmkin. Onda bala týǵan kezde jynysy kórsetilmeı, keıin ózi tańdaıdy”, – dedi Dementeva.
Jumys tobynyń otyrysyna qatysqan onnan astam depýtat bastamany biraýyzdan qoldap, ózderin túzetý avtorlary qataryna qosýdy suraǵan. Olardyń qatarynda Rınat Zaıyt, Edil Jańbyrshın, Ardaq Nazarov bar.
Aıta keteıik, buǵan deıin de májilis depýtattary “BAQ týraly” zań jobasyna LGBT nasıhatyna tyıym salatyn túzetý engizýdi usynǵan edi. Keıin olar bul áreketterge qylmystyq jaýapkershilik engizýdi de kótergen bolatyn. Alaıda sáýir aıynda qabyldanǵan zańnyń sońǵy nusqasyna bul túzetýler enbeı qalǵan.
Mádenıet jáne aqparat vıse-mınıstri Qanat Ysqaqovtyń aıtýynsha, depýtattardyń usynystary zańnyń túpki mátininde qarastyrylmaǵan.