Sırek kezdesetin jaǵdaı: almatylyq dárigerler jańa tehnologıalardyń kómegimen aýyr naýqasty aıaqqa turǵyzdy
Pasıent Almatydaǵy №7 Qalalyq klınıkalyq aýrýhanaǵa asa aýyr halde jetkizilgen. Osydan 10 jyldaı ýaqyt buryn onyń jambas býyny almastyrylǵan. Jaraqat saldarynan sementsiz ádispen bekitilgen protez jambas qýysyna kirip ketken, dep habarlaıdy almaty-akshamy.kz aýrýhananyń baspasóz qyzmetine silteme jasap.
Aýrýhananyń polıjaraqat bólimshesi meńgerýshisi Ramazan Áskerovtiń aıtýynsha, protez urshyq oıyǵyna kirip ketken. Saldarynan jambas qýysy qatty zaqymdanǵan. Naýqas birden jan saqtaý bólimine jetkizildi.
Jaǵdaıy turaqtanǵannan keıin bólimshege aýystyrylyp, klınıka basshylarynyń qatysýymen konsılıým ótkizildi.
«Mundaı jaǵdaılar óte sırek kezdesedi. Biz eki kezeńnen turatyn ota jasaý týraly sheshim qabyldadyq. Birinshisinde ish qýysy arqyly synǵan protez bólshekterin alyp shyqtyq. Jaǵdaıy jaqsarǵannan keıin revızıalyq endoprotez ornattyq. Bul ortopedıalyq operasıa ishindegi eń aýyr otalardyń biri bolyp sanalady. Iaǵnı, bir ret ota jasalǵan jerdi taǵy qozǵap, operasıa jasadyq. Travmatolog-ortopedter men anestızıologtar komandasynyń biliktiliginiń arqasynda kúrdeli ota sátti ótti», - deıdi Ramazan Áskerov.
Pasıent otadan keıin ekinshi kúni tósekte otyratyn boldy. Úshinshi kúnnen bastap arnaıy qurylǵynyń kómegimen júre bastaǵan.
«Bul joǵary tehnologıaly operasıa. Pasıenttiń burynǵy býynynyń ornyna jasandy protez salamyz. Mundaı operasıalardy barlyq klınıkalar jasaı bermeıdi. Ol úshin arnaıy daıyndyqtan ótken mamandar men qural-jabdyqtar qajet. Onyń ústine, Qazaqstanda endoprotezdeý operasıalaryn mindetti áleýmettik medısınalyq saqtandyrý arqyly tegin jasatýǵa bolady», – dep qorytty dáriger.