Almaty ákimi Darhan Satybaldy Bostandyq aýdanyndaǵy nysandardy jańǵyrtý jumystaryn belgilengen merzimde aıaqtaýdy tapsyrdy, - dep habarlaıdy aqshamnews.kz.
Almaty ákimi Darhan Satybaldy jumys saparymen Bostandyq aýdanyna bardy. Sapar Respýblıka alańyndaǵy qala ákimdigi ǵımaratynyń janyndaǵy sýburqaqtardy aralaýdan bastaldy. Qazir munda ákimdiktiń shyǵys jáne batys jaǵyndaǵy alańda jáne Músirepov teatry janyndaǵy tórt sýburqaq kesheninde kúrdeli jóndeý júrgizilip jatyr. Joba aıasynda ınjenerlik júıeler tolyq jańartylyp, jańa sorǵylar men jaryqdıodty júıeler ornatylmaq.
Darhan Satybaldy jobany belgilengen merzimde aıaqtaý úshin merdigerdiń jumys qarqynyn kúsheıtip, sapany baqylaýdy arttyrý qajetin atap ótti. Jóndeý 2025 jyly qazan aıynda aıaqtalady dep josparlanyp otyr. Shahar basshysy jumys demalys kúnderi de toqtamaı, mejeli merzimnen keshikpeý kerek dep eskertti.
Sapar barysynda ákim Ermensaı shaǵynaýdanyna da at basyn burdy. Munda tabıǵı apattyń saldaryn joıýǵa baǵyttalǵan aýqymdy joba qolǵa alynǵan. Joba aıasynda uzyndyǵy 7 shaqyrymdyq sý jáne káriz júıeleriniń qubyry tóselip, eki sý sorǵy stansıasy salynady, kósheler kórkeıtiledi. Ákim bul jobanyń tek josparǵa saı júrýi jetkiliksiz ekenin, ony jyl sońyna deıin tolyq aıaqtap, iske qosý qajetin aıtty. Sebebi bul jumys jeke sektorlar men jańa turǵyn úı keshenderindegi birneshe myń turǵyndy taza aýyz sýmen qamtamasyz etýge baǵyttalǵan.
Al Jáńgir han kóshesinde ákim jaýyn-shashyn kóp túskende jınalatyn sý deńgeıi bir metrge deıin jetetin ýchaskeni aralady. Munda shilde aıynda sý sorǵy stansıasy men sý burýǵa arnalǵan eki qubyr jelisiniń qurylysy bastalmaq. Darhan Satybaldy bul jumysty 2025 jyly jeltoqsanǵa deıin aıaqtap, ákimdiktiń tıisti bólimderimen kelisim jumystaryn der kezinde júrgizýdi tapsyrdy. Bul bolashaqta turǵyn úılerge barý men kólik qozǵalysynda qıyndyqtar týyndamaýy úshin mańyzdy.
Sapar odan ári Kereńqulaq ózeniniń jaǵalaýynda jalǵasty. Munda qala ákimi jaǵalaýdy kórkeıtý jobasyn qarap shyqty.
"Munda qoqys óte kóp, barlyǵyn tazartý kerek", – dedi Darhan Satybaldy ózen jaǵasyn aralaý kezinde. Sonymen qatar ol Kereńqulaq ózenin kóriktendirýge qatysty jobalyq-smetalyq qujattamany jedel ázirleýdi tapsyrdy. "Barlyǵy jumystyń qalaı uıymdastyrylatynyna baılanysty. Eger myqty merdiger bolsa, jumysty jyldam bitiredi", – dedi qala ákimi.
Joba shamamen 2 shaqyrym ózen jaǵalaýyn qamtıdy. Onda terenkýr, sport jáne balalarǵa arnalǵan oıyn alańdary, fýdkort, demalys aımaǵy men muz aıdyny salynbaq. Ákimniń basty talaby – qoldanystaǵy alma baqtary men tabıǵı landshaftty saqtap qalý. Osyǵan baılanysty joba qaıta qaralyp, osy talaptar eskerilýi tıis.
Nurtazın kóshesindegi № 190 mektepte qystaǵy jer silkinisinen keıin qabyrǵalarda, dálizder men sport zalynda jaryqtar paıda bolǵan. Tehnıkalyq saraptama ǵımarattyń qazirgi qaýipsizdik talaptaryna saı kelmeıtinin anyqtady. Munda 417 bala oqyǵan, alaıda mekteptiń jobalyq qýaty nebári 300 oryn. Kún saıyn 80-ge jýyq oqýshy Almaarasan, Kókshoqy, Kazachka jáne t.b. taý bókterindegi eldi mekenderden qatynap oqıdy.
Sapar barysynda ákim osy mektepke qatysty jańa qurylys jobasymen tanysty. Joba aıasynda eski ǵımarattyń ornyna bir aýysymda oqýǵa múmkindik beretin zamanaýı mektep salý josparlanyp otyr. Ol 600 oqýshyǵa arnalmaq.
Sapar sońynda ákim Úlken Almaty ózeniniń arnasyndaǵy 5,7 shaqyrymǵa sozylǵan aýqymdy qaıta jańǵyrtý jobasyn qarap shyqty. Joba aıasynda velojolaqtar, kópirler, balalar alańdaryn salý men jaryqtandyrý, kógaldandyrý jumystary qarastyrylǵan. Qala basshysy qurylys merzimin qatań saqtaý men kúndelikti jaǵalaýda serýendeıtin turǵyndardyń qaýipsizdigine basa nazar aýdarýdy tapsyrdy.
Jumys saparynyń qorytyndysy boıynsha, qala ákimi ákimdik basqarmalary men merdigerlerge qurylys jumystarynyń sapasy men merzimin qatań saqtaýǵa qatysty naqty tapsyrmalar berdi. Árbir nysan shahar basshysynyń jiti baqylaýynda bolady.