BUU-nyń alǵashqy bitimgershilik mısıasy qurylǵanyna 75 jyl toldy.
Qazaqstan Syrtqy ister mınıstrliginde BUU-nyń alǵashqy bitimgershilik mısıasy qurylǵanyna 75 jyl tolý qarsańynda QR Qorǵanys mınıstrligi, BUU-nyń QR-daǵy Ókildigi jáne sheteldik dıplomatıalyq korpýs ókilderiniń qatysýymen is-shara ótti. Bul týraly Almaty-akshamy.kz QR SİM baspasóz qyzmetine silteme jasap habarlaıdy.
İs-sharany ashqan QR Syrtqy ister mınıstriniń birinshi orynbasary Qaırat Omarov Qazaqstan Respýblıkasynyń BUU-nyń bitimgershilik mısıalary sheńberinde óńirlik jáne halyqaralyq qaýipsizdikti qamtamasyz etýdegi BUU-nyń kúsh-jigerin qoldaýy, elimizdiń syrtqy saıasatynyń mańyzdy quramdas bóligi bolyp tabylatynyn atap ótti. Dıplomat qoldaý kórsetkeni úshin seriktesterge alǵys bildirip, Qazaqstan BUU aıasynda bitimgershilik qyzmetin odan ári arttyrýǵa nıetti ekenin málimdedi.
BUU-nyń Qazaqstan Respýblıkasyndaǵy Turaqty úılestirýshisi Mıkaela Frıberg-Storı Qazaqstannyń BUU qyzmetine belsendi qatysýyn joǵary baǵalaı otyryp, Astana tyǵyz yntymaqtastyq jyldarynda bitimgershilik jolynda óziniń tıimdigin dáleldegenin jáne qazaqstandyq áskerı qyzmetkerlerdiń joǵary kásibıligin kórsetkenin joǵary atap ótti. Ol osyndaı mısıalarda jeke tájirıbesi bola otyryp, Almatyda jumys isteıtin «Kazsent» bitimgershilik oqý-jattyǵý ortalyǵy aıasynda bitimgershilik áleýetti arttyrý úshin elimizde jasalǵan jaǵdaılarǵa erekshe nazar aýdardy.
QR Qorǵanys mınıstrligi Halyqaralyq yntymaqtastyq departamentiniń bastyǵy polkovnık Oljas Hýsaıynov, sondaı-aq mısıalarǵa qatysqan qazaqstandyq bitimgershiler, Qazaqstan Respýblıkasy Qarýly Kúshteriniń BUU-nyń bitimgershilik qyzmetine qosqan úlesi týraly mazmundy aqparatpen bólisti.
Qazaqstannyń oń tájirıbesin atap ótken sheteldik dıplomatıalyq korpýstyń ókilderi qazaqstandyq áskerılerge alǵystaryn bildirip, qoldaý kórsetti. Otandyq «kógildir kaskalarǵa» BUU-nyń Lıvandaǵy mısıasy aıasyndaǵy áreketteri úshin joǵary baǵa berdi. Osylaısha, Úndistan Respýblıkasynyń áskerı attashesi sol eldiń brıgadasynda qyzmet etetin qazaqstandyq bitimgershilermen ózara is-qımyl tájirıbesiniń sáttiligin atap ótti. Bul tájirıbeni qazir basqa elder de zerttep jatyr.
Sharaǵa qatysýshylar BUU týy astynda qyzmette jan tapsyrǵan bitimgershilerdi bir mınýt únsizdikpen eske aldy.
