Búgingi Joldaýdyń mán-mańyzy aıryqsha. Onyń arqalaıtyn júgi bir jylmen shektelmeıdi, aýqymy keń, mazmuny da bólek. Bul týraly QR Prezıdenti Qasym-Jomart Toqaev Qazaqstan halqyna Joldaýynda aıtty, dep habarlaıdy almaty-akshamy.kz
«Búgingi Joldaýdyń mán-mańyzy aıryqsha. Onyń arqalaıtyn júgi bir jylmen shektelmeıdi, aýqymy keń, mazmuny da bólek. Biz aldymyzǵa bıik maqsattar qoıyp otyrmyz. Ózderińizben birge Jańa Qazaqstandy qurýǵa kiristik. Barshańyzǵa málim, byltyr egemendiktiń mańyzdy belesine jettik. Tarıhı ólshemmen qaraǵanda, 30 jyl tym kóp ýaqyt emes. Halqymyz Tuńǵysh Prezıdent Nursultan Nazarbaevtyń basshylyǵymen osy kezeńde aýqymdy jumys atqardy. Kóptegen tabystarǵa qol jetkizdi. Alaıda, bereke-birligimizdi saqtamasaq, jetistikterimizdiń bárinen aırylyp qalýymyz múmkin», - dedi Memleket basshysy.
QR Prezıdenti qańtardaǵy dúrbeleń kezinde buǵan kózimiz anyq jetkenin basa aıtty.
«Bul oqıǵalar búkil qoǵamdy dúr silkindirdi. Halqymyz buryn-sońdy bolmaǵan qaýip-qatermen betpe-bet keldi. Memleketimizdiń tutastyǵyna jáne egemendigimizge zor qaýip tóndi. Osy kúnderde jurtymyz Táýelsizdiktiń qadir-qasıetin jan-júregimen sezindi. Tatýlyq pen turaqtylyq, tynyshtyq pen beıbitshilik qanshalyqty mańyzdy ekenin jete túsindi. Biz myzǵymas birliktiń arqasynda memleketimizdi qorǵap qaldyq. Ýaqyty jáne batyl sheshim qabyldap, lańkesterge toıtarys berdik. Men qashanda bárin ashyq aıtyp júrmin. İndet kezinde qalyptasqan ahýal jóninde jurtshylyqqa únemi aqparat berip otyrdym», - dedi Qasym-Jomart Toqaev.