Dál qazir «Almaty aqshamy», «Vechernıı Almaty» gazetterine jazylý naýqany júrip jatyr. Megapolıske qatysty barlyq aqparattar, jańalyqtar, qyzyqty maqalalar osy qos basylymda jaryq kóredi.
«Alataý Aqparat» medıaholdıngi ótken aptadan beri qala turǵyndary úshin qalanyń bas gazetterin tegin taratý aksıasyn uıymdastyryp keledi. Kezekti shara Túrksib aýdanynyń Halyqqa qyzmet kórsetý ortalyǵy men Almaty metropolıteninde ótti. Gazetti taratý barysynda jasy egde tartqan adamdardyń basylymdarǵa degen qyzyǵýshylyqtarynyń basym ekenin baıqadyq. Gazet oqıtyn jastar da joq emes. Degenmen qazirgi zamanda adamdardyń basym kópshiligi negizgi aqparatty, jańalyqtardy elektrondy aqparat quraldary arqyly alatyny shyndyq. Gazet qyzmetkerleriniń maqsaty – halyq arasynda «Almaty aqshamy», «Vechernıı Almaty» gazetterin nasıhattaý, qalalyqtardyń gazetke degen qyzyǵýshylyǵyn arttyrý.
Baqytjamal, zeınetker:
Gazet oqyǵandy jaqsy kórem
- Biz - jastaıymyzdan gazet-jýrnal oqyp ósken urpaqtyń ókilimiz. Qolymyzǵa qandaı da bir gazet túse qalsa, oqyǵymyz kep turady. Aqparatty teledıdardan da tyńdaımyz, qazir qoldaǵy telefonda da álemdegi barlyq jańalyq qoljetimdi ǵoı. Biraq gazetke jarıalanǵan maqaladaı bolmaıdy. Gazette tek aqparatty jazyp qana qoımaı, saraptap, taldap beretini unaıdy. Gazet - tek jańalyqtyń jarshysy emes, bútin bir eldiń aınasy. Halyqqa gazetti tegin taratyp jatqan bastamalaryńyz jaqsy eken. Óıtkeni qazir burynǵydaı gazet-jýrnal asa kóp emes. Sondyqtan halyqtyń qoly jete bermeıdi. Eńbekterińiz jana bersin!
Ahmet Baıtursynuly:
«Birinshi: gazet – halyqtyń kózi, qulaǵy, tili; ekinshi: gazet – jurtqa qyzmet etetin nárse; úshinshi: gazet – halyqqa bilim taratýshy; tórtinshi: gazet – halyqtyń joqtaýshysy».
Nurlan, qala turǵyny:
Saýatty maqala oqyǵym keledi
- Óz basym úıde de, jumys ornynda da gazet-jýrnaldardy qaldyrmaı oqyp júremin. «Almaty aqshamy» gazetiniń turaqty oqyrmanymyn. Saıası taqyryptardaǵy saraptamalardy, sport jańalyqtaryn úzbeı oqımyn. Qazir saıttarda, áleýmettik jelilerde jańalyqtar qysqa da nusqa beriledi. Kóbinese beınejańalyqtar jaqsy qaralady. Biraq gazettiń kótergen júgi aýyr. Óıtkeni gazetke jarıalanǵan maqala tasqa jazylǵandaı bolyp qaǵaz betine túsedi. Sondyqtan gazettiń qundylyǵy da joǵary. Qaǵaz betine túsken materıaldy jazatyn tilshige úlken jaýapkershilik artylady. Jýrnalısen jazǵan ár jańalyǵynyń, maqalasynyń saýatty bolýy talap etiledi. Búginde jastardyń tili shorqaq, kez kelgen sózdi qysqartyp aıtady. Al gazet - oqyrmandy kórkemdikke, durys sóıleýge tárbıeleıtin qural. Sondyqtan óz mamandyǵyna adal gazet qyzmetkerleriniń eńbegine tabys tileımin, qalamdaryńyz muqalmasyn!
Dana, stýdent:
Gazet - muraǵattyń kózi
- Men únemi gazet oqımyn dep aıta almaımyn. Óıtkeni qazir kez kelgen qajet dúnıeni ınternetten qolymyzdaǵy smartfon arqyly ala alatyn zaman ǵoı. Degenmen sabaǵyma, emtıhandarǵa daıyndalǵan kezde maǵan gazetterdiń kóp paıdasy tıdi. Kitaphanalarda ózime qajetti materıaldardy izdegende, gazetke jarıalanǵan maqalalardan taýyp aldym. Basylymdarǵa jarıalanǵan materıaldardyń kóp izdenistiń nátıjesinde jaryq kóretinine kózim jete tústi. Bir kezderde halyqtyń gazetke degen suranysy joǵary boldy ǵoı. Qazirgi tańda gazet-jýrnaldarǵa degen qyzyǵýshylyq báseńdegenimen, ár kezeńde de ár basylymnyń óz oqyrmany bolady. Sizder uıymdastyryp otyrǵan gazetti tegin taratý aksıasynan keıin «Almaty aqshamy», «Vechernıı Almaty» gazetterin jıi oqyp turatyn boldym, kóp rahmet! Gazette kóńilge túıe júretin dúnıeler bar eken.
Indıra ANDIROVA, «Almaty metropolıteniniń» baspasóz hatshysy:
Halyqqa qajet bastama
- Bizdiń metropolıtenniń qyzmetkerleriniń arasynda qazir «Almaty aqshamy», «Vechernıı Almaty» gazetteri jaqsy suranysqa ıe. Óıtkeni, bular ákimdikke qatysty basylymdar bolǵandyqtan, ákimdiktiń atqaryp jatqan jumystarymen tanysýǵa, qaladaǵy barlyq jańalyqtan habardar bolýǵa yntalymyz. Óz basym keıde áleýmettik jeliden, ǵalamtordan sharshaǵan kezde gazet oqyǵandy jaqsy kóremin. Megapolıstegi kishigirim ózgeristerdiń ózi osy gazetterde jaryq kórip jatady. Qalanyń bolashaǵyna qatysty aýqymdy maqalalardy da únemi gazetterden oqyp, bilip otyramyz.
Menińshe, qazir kópshilik adam ınternetke úńilgen sıfrlandyrý zamanynda gazet-jýrnaldardyń da, kitaptardyń da alar óz orny bar. Óıtkeni, qaǵazǵa túsken aqparatty mı ózgeshe qabyldaıdy. Sondyqtan osyndaı aksıalardy uıymdastyryp, halyqqa gazet oqýdy esterine salyp turý durys bastama dep oılaımyn. Qazir bizdiń «Almaty metro polıteni» de beketterde jolaýshylar úshin «bookcrossing», ıaǵnı kitap almasý sharasyn qaıta qolǵa almaqshymyz. Óıtkeni, adam qaǵazǵa basylatyn basylymdardan qol úzip qalmaýy kerek. Bul adam mıynyń durys jumys isteýine, ıntellektýaldyq qabiletine áser etedi. Búginde, ókinishke oraı, metroda kitap ustaǵan jolaýshylardy sırek kóremiz. Biraq ýaqyt óte kele, halyqtyń kitapqa qaıta den qoıatynyna senemin.