Nurym Nurǵalıev 120-ǵa jýyq múmkindigi shekteýli bastaýysh synyp oqýshylaryn bilim nárimen sýsyndatpaq.
Almatylyq ustaz baspanasynan erekshe balalarǵa arnalǵan mektep ashty. Qoldanysqa jańadan berilgen ınklúzıvti bilim oshaǵy Naýryzbaı aýdanynda ornalasqan, dep habarlaıdy Almaty-akshamy.kz Almaty.tv-ge silteme jasap.
Óz baspanasyn ıgi bastamaǵa bergen 15 jyldyq tájirıbesi bar ustaz Nurym Nurǵalıev 120-ǵa jýyq múmkindigi shekteýli bastaýysh synyp oqýshylaryn bilim nárimen sýsyndatpaq. 500 sharshy metrlik jańa mektepte LFK jáne art-terapıa kabınetteri, dybys jazý stýdıasy jáne birneshe sabaq oqıtyn synyp, asqana bar.
«Men – múgedektigi bar balanyń ákesimin. 14 jyl boıy úlken ulymyzdy tárbıelep kelemiz. Erekshe balanyń ata-anasyn túsinemin. 15 jyldan astam pedagogıkalyq is-tájirıbeme súıene otyryp, mektep ashtym. Ulyma kezinde kómektesýge múmkindik bolmady», – dedi ınklúzıvti mekteptiń dırektory Nurym Nurǵalıev
Bastapqy ýaqytta ınklúzıvti mektepte 15 pedagog jumys isteıdi. Elimizde úzdik ustaz atanǵan eńbek ótili mol, tájirıbeli 5 maman bar. Muǵalimder qaýymy da múmkindigi shekteýli jandarǵa qol ushyn sozý úshin kelgen. Mektep dırektorynyń aıtýynsha, bolashaqta bala sany ósken saıyn pedagogıkalyq ujymdy qajettilikke qaraı arttyrý da oıda bar.
«Men ózimniń ulymmen aýlada erkin júre almaıtyndyqtan, osy úı 100 múgedek balanyń úıi bolsyn dep sheshtim. Qoldaýshylar bar, biraq qarajat jaǵynan eshqandaı demeýshi joq. Ár balaǵa mınıstrlik tarapynan bólinetin qarajat ustazdardyń jalaqasyna jetedi dep úmittenip otyrmyz», – dedi ınklúzıvti mekteptiń dırektory Nurym Nurǵalıev.
Erekshe qajettiligi bar balalar mektepte tegin oqıdy. Ázirge eshqandaı dıagnozǵa shekteý joq. Munda arnaıy synypta oqıtyn oqýshylarmen birge, úıde bilim alatyn múmkindigi shekteýli balalardyń da kelýine bolady. Eger ata-ana úıge kelip oqytýdy surasa, oǵan da múmkindik bar. Degenmen, mektepke kelip, kúnine 4 muǵalimnen 4 saǵat bilim alǵan tıimdi. Al úıde bir muǵalimnen bala jalyǵady.
«Balam ózge balalarǵa ilese almaı jatqandyqtan, «osynda aparyp kórińizder» degen usynys boldy. Kelgennen keıin unady. Balalarmen jeke jumys jasaıdy, jyly, tıimdi», – dedi ata-ana Nurshat Beken.
Al mektep dırektorynyń qala ákimdigi tarapynan «múmkindigi shekteýli balalardy tasıtyn avtobýs bólinse eken» degen ıgi tilegi bar. Sondaı-aq ol tegin oqýlyq jetpeıtinin, ystyq taǵammen qamtý máselesi de mazalaıtynyn jetkizdi. Shaǵyn kásibi bar ustaz bolashaqta qalanyń basqa aýdanynan fılıal ashýdy kózdeıdi.