Qatysýshylar aýystyrylyp otyrýy múmkin
Búgin Ulytaý oblysy Ulytaý aýdanynda Prezıdent janynan qurylǵan Ulttyq quryltaıdyń alǵashqy otyrysy ótedi, dep habarlaıdy Almaty-akshamy.kz QazAqparat-qa silteme jasap.
Araǵa shırek ǵasyr salyp oblys mártebesin qaıta alǵan Ulytaý óńirinde QR Prezıdenti janynan qurylǵan Ulttyq quryltaıdyń alǵashqy otyrysy ótedi. Keshe Memleket basshysynyń Jarlyǵymen QR Prezıdentiniń janyndaǵy Ulttyq quryltaı quryldy . Ulttyq qoǵamdyq senim keńesiniń ornyna quramy jaǵynan odan da aýqymdy Ulttyq quryltaı ınstıtýty qurylatyny eń alǵash resmı túrde Prezıdent Qasym-Jomart Toqaevtyń 16 naýryzdaǵy halyqqa Joldaýynda aıtylǵan bolatyn . Keıin Memleket basshysy Qazaqstan halqy Assambleıasynyń HHHİ sesıasynda bul ınstıtýt jalpyulttyq dıalogtiń ámbebap modeline aınalatynyn aıtyp, quramyna kimder kiretinin ataǵan edi. Ulttyq quryltaıdyń qaıtadan qurylymdalǵan Ulytaý óńirinde ótetini 6 maýsymda belgili bolǵan. Ulttyq quryltaıdyń qazirgi quramynda Májilis depýtattary men QHA múshelerinen, azamattyq qoǵam men saıası partıa ókilderinen, sarapshylar men óńirlerdegi qoǵamdyq keńes múshelerinen, kásipkerlerden jasaqtalǵan 117 adam bar. Solardyń bir parasyn atasaq, aqyn Muhtar Shahanov, qazaqtyń tuńǵysh ǵaryshkeri Toqtar Áýbákirov, akademık Asqar Jumadildaev, ekonomıs Jaqsybek Kúlekeev, saıasatker Álıhan Báımenov, jýrnalıs, medıa-menedjer, qoǵam qaıratkeri Ermurat Bápı, Parlamenttiń birneshe shaqyrylymynyń depýtaty Nurtaı Sabılánov, balýan Dáýlet Turlyhanov, ǵalym-bıotehnolog Kúnsulý Zakarıa, dintanýshy Qaırat Joldybaı, ǵalym Anar Fazyljanova sıaqty esimder bar. Memlekettik keńesshi Erlan Qarınniń jazbasyna súıensek, quryltaı jumysyna qatysýshylar aýystyrylyp otyrýy múmkin . Onyń aıtýynsha, Ulttyq quryltaıdyń jumysy onyń quramyna kirgen 117 adamnyń usynys-pikirimen shektelip qlamaıdy. Ol úshin arnaýly onlaın-platforma ázirlengen kórinedi. Iaǵnı, azamattar osy platforma arqyly Ulttyq quryltaı hatshylyǵyna usynys jiberýge múmkindik almaq.