Birde Janqutty sheshen Qunanbaıdyń úıinde otyrǵanda Abaı kelip sálem beredi. Ol kezde Abaıdyń jas shaǵy eken. Abaıdyń tapqyrlyǵyn, óleń shyǵaratyndyǵyn estip júrgen sheshen balany qasyna otyrǵyzyp:
– Shyraǵym, dúnıe nege súıenedi? – dep suraıdy. Abaı:
– Dúnıe úmitke súıenedi.
– Kózdiń kórmesi bola ma?
– Kóz qabaǵyn kórmeıdi.
– Sham jaryǵynyń túspesi bola ma?
– Sham jaryǵy tabanyna túspeıdi.
– Bolat pyshaqtyń kespesi bola ma?
– Bolat pyshaq óz sabyn ózi kespeıdi.
– Tamaǵyna tartpaıtyn maqluqat bola ma?
– Óz tamaǵyna tartpaıtyn maqluqat bolmaıdy, – deıdi bala Abaı. Jaýabyna rıza bolǵan sheshen oǵan óleń túrinde jazyp berýin suraıdy. Sonda Abaı:
Siz suńqar samǵaı ushqan qıadaǵy,
Talpynǵan men balapan uıadaǵy.
Órnekti óleń sózben jaýap bersem,
Dúnıeniń jalǵyz úmit tıanaǵy.
Kóz kórýi jetpeıdi qabaǵyna,
Sham jaryǵy túspeıdi tabanyna.
Óz sabyn bolat pyshaq ózi kespes
Maqluqat tartpaı qoımas tamaǵyna, – depti.
Et jelinip, qymyz ishilgennen keıin Abaı:
– Ata, sizden suraq suraýǵa bola ma? – deıdi.
– E, shyraǵym, suraı ǵoı, – depti Janqutty.
– Ata, arzan ne, qymbat ne, daýasyz ne? – depti Abaı.
Janqutty:
– Shyraǵym, arzan – ótirik, qymbat – shyndyq, daýasyz – kárilik emes pe? Janaryńnyń oty bar eken – aqyndyǵyń shyǵar, mańdaıyń jazyq eken – oılylyǵyń shyǵar, halqyńnyń qalaýly azamaty bol, – dep batasyn beripti.