Jıyrma tórtinshi Sýrdlımpıadada otandastarymyzǵa mol úmit artamyz
Brazılıanyń Kashıas-dý-sýl qalasynda jazǵy Sýrdalımpıadanyń saltanatty ashylý rásimi ótti. Baıraqty básekede álemniń 100 elinen 3500 sportshy sporttyń jıyrma bir túrinen baq synaıdy, dep habarlaıdy Almaty-akshamy.kz.
Sport jáne dene shynyqtyrý isteri komıtetiniń málimetinshe, estý múshesi zaqymdanǵan sportshylar arasyndaǵy olımpıadada Qazaqstan atynan 65 sportshy sporttyń toǵyz túrinen: ústel tenısi, júzý, karate-do, taekvando, dzúdo, jeńil atletıka, grek-rım, erkin kúres jáne badmentonnan el namysyn qorǵaıdy.
Saltanatty is-sharada elimizdiń kók baıraǵyn Samsýnda (Túrkıa) ótken XXIII - jazǵy Sýrdlımpıadanyń chempıony, Álem Chempıonatynyń jáne kóptegen halyqaralyq týrnırlerdiń júldegeri, taekvondıst – Aıan Ábdirash alyp shyqty.
«Osyndaı iri halyqaralyq dodada elimniń baıraǵyn alyp shyǵý maǵan tapsyryldy. Bul men úshin úlken mártebe. Sýrdlımpıadaǵa men tyńǵylyqty daıyndaldym. Bar kúsh-jigerimdi salyp ózime artylǵan úmitti aqtaımyn, degen oıdamyn»,- dedi Aıan.
Aıta keteıik, Samsýn qalasynda (Túrkıa) ótken 23-shi Sýrdlımpıadada qazaqstandyq sportshylar sporttyń 8 túrinen (erkin kúres, grek-rım, dzúdo, taekvondo, karate, júzý, jeńil atletıka, ústel tenısi) óner kórsetken bolatyn. Qazaqstan ulttyq quramasy jalpykomandalyq esepte 25-shi orynǵa ıe bolyp, 1 altyn, 1 kúmis jáne 5 qola medaldi jeńip alǵan.
Jıyrma tórtinshi Sýrdlımpıadada otandastarymyzǵa mol úmit artamyz, deıdi QR Sport jáne dene shynyqtyrý isteri komıteti tóraǵasynyń orynbasary Bekbolat Baıjanov.
«Bul Qazaqstan quramasy qatysyp otyrǵan altynshy jazǵy sýrdlımpıada. Otandyq sportshylarymyz osyǵan deıingi jarystarda júldeli oryndardan kórinip júr. Bul synda da laıyqty nátıje kórsetedi degen oıdamyz. Barsha qazaqstandyqtardy ulttyq quramaǵa jankúıer bolýǵa shaqyramyz», - dedi Bekbolat Qustútinuly.
Taǵy bir aıta ketetin jaıt, sýrdlımpıadalyq sport túrlerin qoldaý maqsatynda memleket tarapynan beriletin qarjylaı syıaqy mólsheri Olımpıada jáne Paralımpıadamen teńestirilgen bolatyn. Iaǵnı atalmysh jarystan birinshi oryn alǵan sportshyǵa 250 000, ekinshi oryn 150 000, úshinshi oryn- 75 000, tórtinshi oryn — 30 000, besinshi oryn — 10 000 jáne altynshy oryn úshin — 5 000 AQSH dollary beriledi.
Jazǵy sýrdlımpıada mamyr aıynyń on besine deıin jalǵasady.