Alataý aýdanynda Boraldaı ózeniniń boıyndaǵy jasyl aımaqty abattandyrý jumystary júrgizilýde. Merdigerlik uıymmen jasalǵan kelisim shart boıynsha qurylystyń aıaqtalý merzimi 2024 jylǵy naýryzǵa josparlanǵan.
Merdiger uıymnyń ókili Almaty qalasy ákiminiń orynbasary Álisher Ábdiqadyrovqa jumys sapary barysynda aıtyp ótkendeı, búginde jer jumystary aıaqtaldy, 70%-ǵa nyǵaıtý jumystary iske asty, eki toǵan tazartyldy, fýtbol men basketbol alańdary qorshaldy. Sondaı-aq, merdiger qurylys jumystary barysynda jergilikti turǵyndar 100-den astam kamazben qaldyrǵan turmystyq qoqys shyǵarylǵanyn atap ótti.
Jobada asfált jáne jabyndy tóseý, ýrnalardy, oryndyqtardy, modýldik sanıtarlyq-gıgıenalyq toraptardy, syrtqy jaryqtandyrý jáne sýarý júıesiniń tirekterin, sý qoımasynyń aınalasyna aǵash pırsterdi ornatý qarastyrylǵan. Belsendi aımaqta balalar men sport alańdaryn salý, tenıs ústelderin ornatý josparlanýda.
Jobada kógaldandyrýǵa erekshe nazar aýdarylatyn bolady. Mıkroklımatty saqtaý úshin mamandar 1,5 myńnan astam aǵash (terek, úıeńki, jemis) jáne 5 myńǵa jýyq gúldi ósimdikterdi otyrǵyzýdy josparlap otyr. Landshaft dızaınerleri gúlzarlardy otyrǵyzýǵa daıyndalýda, bólek aımaqta alma aǵashtaryn otyrǵyzatyn qazaq baý- baǵy aımaǵy bolady, bolashaqta munda naýryz aıynda halyqtyq merekeler ótkizýge, Japonıadaǵy sakýra gúlderine uqsas qyzǵaldaqtardyń gúldenýin kórýge bolady.
Sonymen qatar, shaǵyn sý qoımasynyń aınalasynda lotos pen sý lalagúlderin otyrǵyzatyn japon baqshasynyń qurylysy qarastyrylǵan. Kógaldandyrý jumystary sýarý júıesin ornatqannan keıin bastalady, sý Boraldaı ózeninen alynady jáne qosymsha skvajına bolady.
Boraldaı ózeniniń arnasyn nyǵaıtý jobasy sý tasqyny máselesin sheshýge de yqpal etedi, óıtkeni oǵan qalanyń joǵarǵy bóliginen úsh kanal men eki kolektor tartylǵan.
"Bul - Alataý aýdanyndaǵy alǵashqy abattandyrylǵan jaǵalaý.Ol jergilikti turǵyndar úshin jańa serýendeý ortalyǵyna aınalady, al bul shamamen 30 myń adam – Saıaly, Kókqaınar, Ójet. shaǵyn aýdan turǵyndary. Ózderińiz bilesizder, qazir Almatynyń barlyq aýdandary teń áleýmettik, kóliktik jáne rekreasıalyq ınfraqurylymmen jáne ómirdiń joǵary standarttarymen qamtamasyz etiletin polıortalyqtyq qaǵıdat boıynsha damyp keledi. Bul joba polıortalyqtyń jarqyn úlgisi bolady", - dedi Álisher Ábdiqadyrov.
Jumys saparynyń qorytyndysy boıynsha merdiger uıymǵa jumys qarqynyn arttyrý jáne belgilengen merzimde jaǵalaýdy abattandyrýdy sapaly aıaqtaý tapsyryldy.