2023 jylǵy 21 tamyzda Qazaqstan men Ázerbaıjannyń jetekshi telekomýnıkasıalyq kompanıalary Qazaqtelekom men AzerTelecom Qazaqstan-Ázerbaıjan baǵyty boıynsha Transkaspıı talshyqty-optıkalyq baılanys jelisin (TOBJ) salýǵa jáne paıdalanýǵa jaýapty birlesken kásiporyndy tirkeý týraly qujatqa qol qoıdy, dep habarlaıdy Almaty-akshamy.kz.
Kaspıı teńiziniń túbimen qurylys jumystary jaqyn arada bastalady.
Qazaqstannyń Ázerbaıjandaǵy Elshisi Álim Baıel jobany iske asyrýdy jedeldetý jónindegi tapsyrmany Qazaqstan men Ázerbaıjannyń Memleket basshylary osy jyldyń sáýir aıynda bergenin, maýsym aıynda QR Premer-Mınıstri Á.Smaıylovtyń Ázerbaıjanǵa sapary barysynda TOBJ salý jónindegi birlesken kásiporyn qurý týraly kelisimge qol qoıylǵanyn habarlady.
Kabeldik jeliniń uzyndyǵy shamamen 380 km quraıdy, ótkizý qabileti sekýndyna 400 terabıtke deıin jetpek. Transkaspıı kabel jelisi Azıa men Eýropa arasynda derekterdiń kóp terabaıttyq kólemin ótkizýdi qamtamasyz ete otyryp, marshrýttardy ártaraptandyrmaq, elderimizdiń aqparattyq qaýipsizdigin nyǵaıtpaq, ınternettiń jyldamdyǵyn arttyrmaq jáne óńirdiń ekonomıkalyq damýyna serpin bermek. TOBJ qurylysy Eýropa men Azıa arasynda jańa sıfrlyq telekomýnıkasıalyq dáliz qurý boıynsha aýqymdy Sıfrlyq Jibek joly (Digital Silk Way) jobasynyń bóligi bolyp sanalady.
Jobany iske asyrý nátıjesinde Qazaqstan men Ázerbaıjan halyqaralyq trafık tasymaldanatyn sıfrlyq habqa aınalady dep kútilýde.