Maqsaty – óskeleń urpaqty rýhanı tárbıeleý
Almatylyq Aqjol Ahmetova «Bıznestiń jol kartasy – 2025» memlekettik baǵdarlamasy aıasynda zergerlik buıymdar jasaıtyn óndiristik seh ashý úshin 5 mln teńge kóleminde grant aldy, dep habarlaıdy Almaty-akshamy.kz Almaty.tv-ge silteme jasap.
Kásipker memlekettik baǵdarlamaǵa qatysý úshin 2021 jyldyń kókteminde «Qolday» kásipkerlik ortalyǵynda ótinish bergen. Óńirlik komısıa músheleriniń aldynda jobany sátti qorǵap, qarjy qolyna tıgennen keıin, arada birneshe aı ótken soń 2021 jyldyń qazan aıynda kásip saltanatty túrde ashyldy.
Aqjol Ahmetova memlekettik baǵdarlamadan túsken qarajatqa lazerlik kesýge, balqytýǵa, quıýǵa, kúmisti jyltyratyp, óńdeýge arnalǵan stanoktar, sondaı-aq qajetti shıkizattardy, mys, kúmis, tabıǵı tastar satyp aldy.
Kásipker kelinshektiń alǵashqy klıentteri – óziniń týystary. Óıtkeni olar Aqjoldyń erekshe talǵamyna, tabıǵı darynyna senedi. Ol shashbaý, bilezik, júzik, alqa sekildi dástúrli zergerlik buıymdardy jańa stıldi dızaınmen jasaıdy. Shashbaýdyń bir jıyntyǵy shamamen 60 myń teńge turady, bilezik – 20 myń teńge, neke júzigi – 15 myń teńge. Mundaı buıymdardy ulttyq naqyshtaǵy áshekeılerdi joǵary baǵalaıtyn adamdar qalyńdyq jasaýyna, jas jubaılarǵa syılyqqa, analarynyń mereıtoıyna, áriptesteri men seriktesterine qurmet belgisi retinde satyp alady.
«Atam belgili zerger bolǵan, men sol kisiniń kásibin jalǵastyrsam dep armandaýshy edim. Negizgi mamandyǵym – ekolog jáne bastaýysh synyp muǵalimimin, eki joǵary bilimim bar. Memlekettik baǵdarlama meniń armanymdy júzege asyrýyma, ulttyq naqyshtaǵy zergerlik buıymdardy jasaıtyn kásip ashýyma múmkindik berdi. Qazirgi shaǵyn óndiris ornymda ázirge 2 zerger, esepshi jáne sharýashylyq boıynsha kómekshim jumys isteıdi. Men mamandarǵa buıymnyń dızaınyn jasaýǵa kómektesemin, óz ıdeıammen bólisemin», – deıdi kásipker Aqjol Ahmetova.
Onyń aıtýynsha, osyndaı kásip ashýynyń negizgi maqsaty – óskeleń urpaqty rýhanı-adamgershilik turǵyda tárbıeleý, uly dala nyshandaryn qaıta jańǵyrtý.
«Ertede úlken ájelerimiz boı jetip kele jatqan qyzdyń shashyna shashbaý taǵatyn bolǵan. Shashbaýdyń syńǵyry neǵurlym qatty estilse, qyz sypaıy bolýy úshin soǵurlym eskertýler jasap otyrǵan. Osylaısha tal shybyqtaı buralyp ósip kele jatqan qyzdyń júrisi aqqýdaı, minezi mamyqtaı, ádepti ári baıypty bolýyna shashbaýdyń tıgizer paıdasy kóp. Kúmis bilezikter áıel adamdar as úıde jumys istegen kezinde tazalyq saqtaýǵa kómektesetin mańyzdy qural retinde qoldanylǵan. Áshekeılerge salynǵan árbir sýret pen órnektiń ózindik maǵynasy bar, olar adamdy suq kózden, qara nıetten qorǵaıdy. Kúmis altynnan da baǵaly, paıdaly metal dep sanalǵan. Mysaly, eger kúmis qaraıyp ketse, sol áshekeıdi taǵyp júrgen adamnyń densaýlyǵy syr berdi degen sóz. Sondaı-aq ıslam dininde de kúmistiń paıdasy men ereksheligi týraly aıtylady. Sondyqtan men kópshiliktiń nazaryn osyǵan aýdarǵym keledi, áshekeı alarda kúmisti tańdasa eken degen tilegim bar, – deıdi Aqjol Ahmetova.