Almaty qalasy ortalyqtandyrylǵan kitaphana júıesi Jambyl atyndaǵy qalalyq jasóspirimder kitaphanasynyń keńistigi «Rýhanı jańǵyrý» baǵdarlamasy aıasynda modernızasıalanǵan. Osy rýhanı mekenge Memleket basshysy Almatyǵa saparynda arnaıy at basyn burǵan edi. Kitaphananyń tynys-tirshiligimen tanysyp, jastarmen, oqyrmandarmen júzdesken bolatyn.
Kóp uzamaı Prezıdenttiń halyqqa Joldaýynan mádenıet qyzmetkerleri, onyń ishinde kitaphanashylardy atap aıtqany kóńilge qýanysh uıalatqany ras.
Sózdiń rasy, kitaphanashylardyń eńbegi kóp jaǵdaıda elenbeı, qalys qalyp jatady.
Baıaǵyda bir memleketti qurtý úshin kitaphanalaryn órtegen eken. Bul degen - tarıhty joǵaltý. Kitaphana - tutas bir eldiń tarıhyn saqtaýshy oshaq. Sondyqtan kitaphanalarǵa erekshe kóńil bólinýi de tarıhı oqıǵa biz úshin.
Sondaı-aq Ulttyq qoǵamdyq senim keńesiniń 4-otyrysynda: «Búgingi zamanda kitapsyz, sondaı-aq kitaphanasyz adamnyń oıdaǵydaı damýy múmkin emes. Búkil álemdegi kitaphanalar - bilim men mádenıettiń oshaǵy, jańa oılar men tyń pikirlerdiń mekeni. Elektrondy formattyń qarqyndy damyp jatqanyna qaramastan, dástúrli kitaphananyń aǵartýshylyq róli eshqashan mánin joǵaltpaıdy. Bul rette osy saladaǵy zamanaýı úrdisterdi eskergenimiz jón. Mysaly, men Almaty qalasyndaǵy kitaphanalardy jańǵyrtýǵa arnalǵan osyndaı utymdy jobalar bar ekenin bilemin», - degen bolatyn Memleket basshysy Qasym-Jomart Toqaev.
Memleket basshysynyń búgingi Joldaýynda da elimizdegi, memleketimizdegi jáne halyqaralyq basty jaǵdaılar sóz boldy.
Kitaphana memlekettik baǵdarlamalar týraly oqyrmandaryna jetkizýge mindetti. Biz, kitaphanashylar, Joldaýdaǵy qamtylǵan barlyq baǵyttarǵa arnaıy túsindirý, talqylaý, pikirlesý jumystaryn josparlap otyrmyz.
«Halqymyz úshin zıaly qaýymnyń orny qashanda erekshe. Ult taǵdyry synǵa túsken sátte kózi ashyq azamattar árdaıym kósh bastaǵan. Adamdarǵa jón siltep, jastarǵa baǵyt-baǵdar bergen. El aǵalary bir aýyz sózben tentegin tyıyp, tektisin tórge otyrǵyzǵan. Biz qanymyzǵa sińgen osy qasıetten aıyrylmaýymyz qajet. Qazir ǵalamtor dáýiri. Ondaǵy beıbereket aqparat urpaqtyń sanasyn ýlap jatyr. Bir sáttik tanymaldyqty kórsetetin tamyrsyz ıdeıalar jappaı beleń alýda. Dál osy kezeńde ult zıalylarynyń ustanymy jáne belsendiligi aıryqsha mańyzdy. Zıalylardyń eńbegi marapatymen emes, salıqaly sózimen jáne naqty isimen baǵalanady», - dedi Memleket basshysy búgingi Joldaýynda.
Kitaphanalar osy zıaly qaýym, aqyn-jazýshy, ǵalym, tarıhshylardyń eńbekterin oqyrmandarǵa nasıhattap, bilimge qushtarlyqtaryn arttyryp, jastardyń bos ýaqyttaryn tıimdi paıdalanýyna kómektesetin birden-bir ortalyq retinde jumysyn jalǵastyra bermek.
«2022 jyldan bastap mýzeı qyzmetkerleri men kitaphanashylardyń jalaqysy ósedi». Bul da - búgingi Joldaýdyń biz úshin mańyzdy tusy. El rýhanıatyn, onyń ishinde jastardyń rýhanı baılyǵyn kóterýge atsalysyp otyrǵan mamandardyń turmystyq áleýetiniń jaqsarǵany, árıne, jaqsy.
Endeshe, Memleket basshysynyń mádenıet qyzmetkerlerin qoldaý týraly aıtqany qoǵamda kitaphanashynyń mártebesin kóterip, bedelin arttyrary sózsiz.
Jalpy, adam rýhanı baıyp, sanasy serpilmeı, eshqandaı jetistikke jete almaıtyny báseneden belgili. Sondyqtan mádenıet, bilim salasyna basa kóńil bólgeni bul salalarǵa da aıtarlyqtaı ózgeris engizeri anyq.
Jıyrma birinshi ǵasyr – aǵymy bólek ǵasyr. Tym jyldam, tym jańa ári jańalyqtarǵa toly. Osy tolqynystan Jambyl jasóspirimder kitaphanasy qalys qalmaı, el bolashaǵy, memleket damýy úshin jasalǵan asa mańyzdy Joldaýǵa qoldaý bildiremiz.
Kitaphana bilim-mádenıet oshaǵy, aqparat ortalyǵy bolǵandyqtan, osy Joldaýdyń halyqqa jetýine jáne elimizdiń damýyna árbir azamat múddeli ekenin jetkizý úshin birqatar is-sharalar, túsindirme jumystary júrgiziletin bolady.