Qazaqstanda bes túrli vaksına qoljetimdi
QR Densaýlyq saqtaý mınıstrligi sanıtarlyq-epıdemıologıalyq baqylaý komıtetiniń resmı ókili Erjan Baıtanaev halyqty koronavırýs ınfeksıasyna qarsy vaksınalaý jumystary týraly aıtyp berdi, dep habarlaıdy Almaty-akshamy.kz
«Qazirgi ýaqytta respýblıka boıynsha koronavırýs ınfeksıasyna qarsy vaksınalaýdy uıymdastyrý jáne júrgizý jumystary jalǵasýda. 2021 jylǵy aqpannan bastap óńirlerge 18,5 mln astam vaksına dozasy jetkizildi, onyń ishinde İ komponentke 9,4 mln doza jáne İİ komponentke 9,1 mln doza vaksına bar. Ázirge respýblıka boıynsha birinshi komponentpen 7 884 798 adam egildi, ıaǵnı tıisti kontıngenttiń 79,1%-y qamtyldy, ekinshi komponentpen 6 942 756 adam (69,6%) vaksınalandy», - dedi Erjan Baıtanaev.
Onyń aıtýynsha, QR Densaýlyq saqtaý mınıstrligi jergilikti atqarýshy jáne múddeli memlekettik organdarmen halyqty koronavırýs ınfeksıasyna qarsy ımmýndaý jónindegi keshendi jospardy ázirledi jáne maquldady. Ol koronavırýsqa qarsy vaksınalaýdy uıymdastyrý, halyqaralyq tájirıbeni zerdeleý, profılaktıkalyq ekpelerdi esepke alýdy sıfrlandyrý jáne halyqpen vaksınanyń mańyzy týraly komýnıkasıalyq jumysty qamtıdy.
«Keshendi jospar Qazaqstan Respýblıkasy aýmaǵynda koronavırýs ınfeksıasynyń paıda bolýy men taralýyna jol bermeý jónindegi vedomstvoaralyq komısıanyń 2021 jylǵy 9 aqpandaǵy hattamasymen bekitilgen. Búginde keshendi jospardyń barlyq tarmaqtary oryndaldy. Qazirgi tańda KVI-ǵa qarsy vaksınamen qamtý boıynsha Qazaqstan TMD elderi arasynda 2-shi jáne álemniń barlyq elderi arasynda 42-shi orynda tur. Qazaqstanda 9,9 mln adamǵa bes túrli vaksına dozalary qoljetimdi. Dúnıejúzilik densaýlyq saqtaý uıymy osy ınfeksıaǵa qarsy jyl sońyna deıin halyqtyń 40%-dan astamyn jáne 2022 jyly 70%-yn vaksınamen qamtýdy usynady», - deıdi E. Baıtanaev.
2021 jylǵy 12 qazanda Qazaqstanda koronavırýs ınfeksıasyna qarsy vaksınanyń 1-shi komponentin 7 915 434 adam, 2-shi komponentin 6 983 073 adam saldyrdy. Sonymen birge, Qazaqstanda 12-17 jastaǵy balalar men júkti áıelderdi vaksınalaý jumystary josparlanýda. Osyǵan baılanysty mınıstrlik Pfizer kompanıasymen 2021 jyldyń sońyna deıin 4 mln doza vaksınany jetkizý boıynsha shartqa qol qoıdy.
Qazirgi ýaqytta respýblıka azamattaryna «Gam-KOVID-Vak» (Spýtnık V), «QazVac», «Hayat-Vax», «KoronaVak» jáne «Sınofarm» syndy bes túrli vaksına qoljetimdi.