Almaty qalasyn kórkeıtýge baǵyttalǵan «Halyq qatysatyn búdjet – 2025» jobasyna ótinim qabyldaý kezeńi aıaqtaldy. Qalanyń damýy – ákimdik bastamalarymen qatar, halyqtyń belsendiligi men usynysyna da tikeleı baılanysty. Bul sóz búginde qur uran emes, naqty iske aınaldy. Almatyda sońǵy jyldary júzege asyp jatqan «Halyq qatysatyn búdjet» jobasy – sonyń dáleli.
Qala aýdandarynan túsken usynys sany – 4 632. Bul kórsetkish – shahar turǵyndary týǵan qalasynyń kelbetin jaqsartýǵa beı-jaı qaramaıtynynyń aıǵaǵy desek te bolady. 9 qyrkúıekte bastalǵan ótinim qabyldaý kezeńinde almatylyqtar aýlalardy abattandyrý, jaryqtandyrý, kógaldandyrý, balalar jáne sport alańdaryn salý sekildi naqty jobalar usynǵan.
Jobaǵa kelip túsken barlyq bastamalar endi sarapshylar keńesiniń qaraýyna beriledi. Olar usynystardy tehnıkalyq turǵyda oryndalý múmkindigine, tıimdiligi men mańyzdylyǵyna qaraı baǵalaıdy. Odan keıin iriktelgen jobalar onlaın daýys berýge shyǵarylady. Eń kóp daýys jınaǵan bastamalar jeńimpaz atanyp, 2026 jyly iske asyryla bastaıdy.
Bul jobanyń basty maqsaty – qala turǵyndarynyń óz aýdanynyń damýyna tikeleı qatysýyna múmkindik berý. Turǵyndar usynys bildiredi, joba daıyndalady, onlaın daýys berý arqyly tańdaýly joba anyqtalady. Qalalyq ákimdik olardy júzege asyrýǵa naqty qarjy bóledi. Nátıjesinde naqty suranysqa saı, qajetti nysandar men abattandyrý jumystary atqarylady.
Qazirgi tańda qalada aýlalardy kógaldandyrý, qoǵamdyq keńistikterdi abattandyrý, aryq júıelerin jóndeý, balalar jáne sport alańdaryn ornatý syndy kóptegen jobalar osy bastama arqyly iske asyp jatyr.
· Bos alań – endi balalardyń mekeni
Bıyl Medeý aýdanynda bos jatqan jerge jańadan balalar alańqaıy jáne sport alańy ornatyldy. Bul – turǵyndardyń tikeleı ótinishi boıynsha júzege asqan joba. Balalarǵa arnalǵan qaýipsiz oıyn elementteri men eresekterge arnalǵan jattyǵý trenajerleriniń ornatylýy – qoǵamdyq keńistiktiń tıimdi paıdalanylýynyń úlgisi.
· Altynsarın kóshesindegi jańa skver
«Halyq qatysatyn búdjet» jobasynyń aıasynda iske asqan taǵy bir mańyzdy nysan – 8-nshi shaǵyn aýdanda, Altynsarın kóshesiniń boıyndaǵ bıyl kúzde ashylǵan jańa skver. Munda jerge kespe tas tóselip, 27 zamanaýı kóshe shamy ornatyldy, 180-nen astam aǵash egildi, demalys úshin uzyn oryndyqtar qoıyldy. Bul skver qala ishindegi tynysh ári kórkem demalys ornyna aınaldy.
· Qalaǵa janashyrlyq – ortaq is
Almatyda júzege asyp jatqan «Halyq qatysatyn búdjet» – jaı joba emes, qalalyq basqarýdaǵy jańa serpin. Halyqtyń daýys berýi arqyly naqty máseleler sheshimin taýyp, qala mádenıeti men ınfraqurylymy jańaryp keledi. Mundaı bastamalar – tek ákimdik emes, ár turǵynnyń jaýapkershiligi men belsendiligi arqyly júzege asatyn ıgilikti sharýa.
«Almaty damý ortalyǵy» usynǵan málimetke súıensek, ońtústik astana aýdandary ishinde Jetisý men Naýryzbaı aýdandarynyń turǵyndary erekshe belsendilik tanytqan. Turǵyndardyń belsendiligi men ıdeıalary qalanyń ómir súrýge jaıly ortaǵa aınalýyna tikeleı áser etedi.
«Halyq qatysatyn búdjet» – bul bılik pen halyq arasyndaǵy ashyq dıalogtiń naqty kórinisi. Qala – bárimizdiń úıimiz. Ony kórkeıtý turǵyndardyń birlesken is-áreketi pen shynaıy ynta-yqylasynan bastalady.
· Bastama kóterý sharttary
Joba eń áýeli turǵyndardyń suranysyn óteýdi kózdeıdi. Biraq bir usynys 92,3 mln teńgeden aspaýy tıis. Qalanyń aýlalaryn, kóshelerin jáne aýdandaryn abattandyrý boıynsha usynystardy kámeletke tolǵan qala turǵyndarynyń barlyǵy bere alady.
Sýret: Roza Raqymqyzy
Bıyl úlgermeı qalsańyz, aldaǵy jyldary da bastamamen shyǵýǵa bolady. Ótinimge jobanyń ataýy men sıpattamasyn, ornalasqan jeriniń mekenjaıyn, boljamdy fotosýretterdi, syzbany nemese eskızdi, usynys smetasyn qosa tapsyrý qajet.
Baıqaýǵa qatysý sharttary men onyń júzege asý barysyn budget.open-almaty.kz saıtynan tanysa alasyz.