Qıyn sátte qostanaılyqtarǵa qol úshin sozǵandardyń qatarynda «Alataý Aqparat» medıaholdınginiń qyzmetkerleri de bar. Alǵashqylardyń biri bolyp kómek kórsetýge nıet bildirgen ujym músheleri órtten zardap shekkenderge 280 myńǵa jýyq teńgeni quraǵan bir kúndik jalaqylaryn aýdardy.
Esterińizde bolsa, 2022 jyldyń 2 qyrkúıeginde Qostanaı oblysynyń ormandarynda órt bolyp, saldarynan birneshe eldimeken túgeldeı janyp ketken edi.
Aıtyp kelmeıtin apattan zardap shekken qostanaılyqtarǵa Memleket basshysy Qasym-Jomart Toqaev ózi baryp, azamattardyń qaýipsizdigin qamtamasyz etýge, sondaı-aq Úkimetke tótenshe jaǵdaı saldarlaryn joıý úshin qajetti kómektiń barlyǵyn kórsetýge tapsyrma bergen bolatyn. Áp-sátte álem nazaryn aýdartqan alapat órttiń saldary ońaı bolǵan joq. Biraq «kóp túkirse – kól» degen. Qyzyl jalynǵa oranǵan óńirge elimizdiń ár aımaǵynan gýmanıtarlyq, qarjylaı kómek kórsetip jatqan halqymyz óziniń birligin kórsetti. Tipti jeke kásipkerler erikti túrde óziniń jeke qarajatyna kıim-keshek te jiberip jatty.
Tilsiz jaýmen betpe-bet kelgen halyq qaýipsiz jerge kóshirildi. Úıinen aıyrylǵan jáne ýaqytsha evakýasıalanǵan turǵyndarǵa elimizdiń ár aımaǵynan gýmanıtarlyq kómek kórsetilip, elimizdegi jeke kásipkerler men kompanıalar aqsha aýdardy. Birneshe memlekettik organ qyzmetkerleri bir kúndik eńbekaqysyn berdi. Qarjy jáne Ulttyq ekonomıka mınıstrligine Úkimettiń rezervinen órtten keltirilgen zalaldy óteýge qarajat bólý týraly qaýly jobasyn daıyndaý tapsyryldy.
Memleket basshysynyń tapsyrmasy aıasynda baspanasynan aıyrylǵan azamattar úshin jańa turǵyn úıler salý jumysy shuǵyl bastalyp, qurylysshylar dereý iske kirisken bolatyn. Prezıdenttiń jeke baqylaýynda bolǵan bul másele búginde óz nátıjesin berip, Qostanaı óńirinde órtten zardap shekkenderge arnalǵan úıler boı kóterdi. Kúni keshe Qostanaı oblysynyń ákimi Áýlıekólde boı kótergen jańa yqshamaýdanǵa arnaıy baryp, táýlik boıy úzdiksiz júrgizilip jatqan qurylys jumystarymen tanysyp qaıtty. Qazdaı tizilgen qyzyl shatyrly úıler qajetti ınfraqurylymmen tolyqtaı qamtamasyz etilgen. Qazirgi tańda barlyq úıge jylý berildi.
Resmı derekterdegi málimetterge súıensek, turǵyn úılerdiń jáne ınjenerlik jelilerdiń jobasyn «KazQSǴZI» AQ jáne «Memsaraptama» RMK ınstıtýttary ázirlegen. Aıtýlarynsha, barlyq úı sý, gaz, elektr energıasy, sondaı-aq kirme joldarmen qamtamasyz etilgen. Qostanaı oblysy ákimdigi búgingi tańda 13 merdiger uıymnyń kúshimen (690 qurylysshy men 11 tehnıkalyq qadaǵalaý mamany jumyldyrylyp, 82 tehnıka tartyldy) turǵyn úıler men ınjenerlik jelilerdiń qurylys-montajdaý jumystary júrgizip jatqandaryn jetkizdi.
Aıta keteıik, Qasym-Jomart Toqaev órt sóndirýshilermen kezdesýinde alapat alaýmen kúresken sarbazdarǵa alǵysyn aıtyp, olardy nagradalarǵa usynyp, qarjylaı syılyqaqymen marapattaıtynyn jetkizdi. Memleket basshysy sapar sońynda eriktilermen de jolyǵyp, syn saǵatta shet qalmaı, qolushyn bergen azamattarǵa «Sizder naǵyz patrıotsyzdar, sizderdi maqtan tutamyn» dep alǵysyn aıtqan bolatyn.