Májilis ǵımaratynda parlament palatalarynyń birikken otyrysy ótip jatyr. Otyrysta Konstıtýsıalyq sottyń tóraǵasy Elvıra Ázimova QR Konstıtýsıalyq Sotynyń «Qazaqstan Respýblıkasyndaǵy konstıtýsıalyq zańdylyqtyń jaı-kúıi týraly» joldaýy jóninde baıandady, dep habarlaıdy Almaty-akshamy.kz.
Onyń sózinshe, bıyl bes aıda 3000-nan astam azamat óz quqyqtaryn konstıtýsıalyq qorǵaýǵa júgindi.
«Bul sıfrlar azamattardyń jańa organǵa degen jaı ǵana qyzyǵýshylyǵynyń dáleli bolyp tabylmaıdy, ótinish berýshilerdiń árqaısysynyń óz quqyqtaryn qorǵaý nıetin rastaıdy. Bul rette Qazaqstan zańnamasynda Konstıtýsıalyq Sotqa júgingenge deıin quqyqtyq qorǵaýdyń barlyq basqa quraldaryn qoldaný týraly talap joq», - dedi Elvıra Ázimova.
Kelip túsken ótinishterdiń jartysyna jýyǵy (shamamen 41%) sot sheshimderimen kelispeýge qatysty. Tóraǵanyń sózinshe, bul rette Konstıtýsıalyq Sot sot sheshimderine baǵa berýge quqyly emes ekenine nazar aýdarý kerek.
«Azamattardan kelip túsken ótinishterdiń bir bóligi sot aktileriniń oryndalmaýyna, turǵyn úı jáne eńbek qatynastaryna, áleýmettik qorǵaýǵa, jazalardyń oryndalýyna, aqparatqa qol jetkizýge, jeke tulǵalardyń bankrottyǵyna jáne taǵy basqalarǵa qatysty. Ótinishterdiń tórtten birinde ǵana (26%) azamattar zańdar men basqa da normatıvtik quqyqtyq aktilerdiń konstıtýsıalylyǵyn tekserýdi suraıdy. 20 óńir bólinisinde eń kóp ótinishter Astana, Almaty qalalary men Qostanaı oblysynyń turǵyndarynan kelip tústi. Ótinishterdi qaraý qorytyndysy boıynsha Konstıtýsıalyq Sot Respýblıkadaǵy konstıtýsıalyq zańdylyqtyń jaı-kúıi týraly jyl saıynǵy joldaýyn usynýǵa mindetti»,-deıdi QR Konstıtýsıalyq sotynyń tóraǵasy.
Elvıra Ázimovanyń aıtýynsha, osy kezeńdegi konstıtýsıalyq is júrgizý qorytyndysy boıynsha, ókinishke qaraı, jekelegen normatıvtik quqyqtyq aktilerde eleýli olqylyqtardyń bar ekeni anyqtaldy.
«Qabyldanǵan on segiz normatıvtik qaýlynyń beseýinde normalar konstıtýsıalyq emes dep tanyldy. Taǵy beseýi boıynsha Konstıtýsıalyq Sot birkelki quqyq qoldaný maqsatynda tıisti normalarǵa túsindirme berdi. Qazir úkimet pen múddeli organdarǵa qajetti sharalar qabyldaý usynyldy», - dedi tóraǵa.