Otandyq fılmniń sújeti sportta úlken jetistikke jetýdi armandaǵan shańǵyshynyń ómiri jaıynda.
Alaıda, apattyń saldarynan basty keıipker mansabyn jalǵastyrý múmkindiginen múldem aırylady. Osylaısha, onyń ómiri paralımpıadashylarmen kezdesýden keıin túbegeıli ózgeredi. Sport janryndaǵy týyndy kórermendi sońyna deıin qyzyǵýyshylyq seziminde ustaıdy. Sebebi basty keıipkerdiń ómir jolynda kezdesken barlyq qıyndyqty eńsere me joq pa, armanyna qoly jete me barlyǵy sońynda belgili bolady, dep habarlaıdy Almaty-akshamy.kz.
«Fılmge tánti boldym. Avtorlar shıelenisken hıkaıany jan tolǵanystarymen úılestirip, biz keıipkerlermen birge ýaıymdap otyrdyq. Olarmen birge birde qýanyp, birde muńaıyp otyrdyq. Mansap, otbasy, dostyq. Munyń bári bar. Kıno maǵan qatty áser etti», - dedi kórermen Marıe-Krıstıne Knop.
Kórsetilimnen keıin kórermenderdi tosyn syı kútti. Fılmniń premerasyna arnaıy túsirilim toby kelip, sheteldik kórermendermen kezdesti. Júzdesý barysynda olar shyǵarmashylyq proses, tys qalǵan kadrlar men qıyndyqtar týraly aıtty.
«2018 jyly Pchónchhanda paralımpıadada altyn júlde utqan otandasymyz Aleksandra Koládınmen bolǵan shynaıy oqıǵadan shabyt aldym. Biz adamdardy yntalandyratyn kıno túsirgimiz keldi. Kórgennen keıin izgi ister jasaýǵa nıeti bolsyn dep. Shýchınskte túsirgende qatty aıaz turyp, kúshti jelden dekorasıalarymyz ushyp ketken. Asqar İlıasov juqa jeıdemen turǵan. Ol sportshynyń tek shańǵy tebýine ǵana arnalǵan. Al biz uzaq ýaqyt kóp dúbl túsirdik qoı. Bárimiz ony jylytyp otyrdyq. Oǵan qosa akterlerimizdiń kóbisi shańǵy tebe almaıtyn. Olımpıada chempıonymyz Elena Hrýstalóva bir aıda bárin úıretti», - deıdi «Paralımpıadashy» fılminiń rejıseri Aldıar Baıraqymov.
«Paralımpıadashy» fılmi álemdik kórsetilimin bastady. Berlınge deıin kartına Tashkentte kórermen nazaryna usynyldy. Endi avtorlar ony Fransıa men AQSH-ta kórsetýdi josparlap otyr.