«Balapan» arnasynyń prodúseri balalarǵa arnalǵan kontent qurý máselesin kóterdi
«Balapan» telearnasynyń bas prodúseri Sandýǵash Kenjebaeva telearnalar balalarǵa arnalǵan kontentke kem degende eki saǵat efır ýaqytyn bólýi kerek dep sanaıdy. Mundaı usynys Qazaqstan halqy Assambleıasynyń keńeıtilgen otyrysynda aıtyldy, dep habarlaıdy Almaty-akshamy.kz.
«Balapan» - jańa týǵan sábıden bastap 8 jasqa deıingi balalarǵa arnalǵan telearna. Balanyń sanasy tal besikten mektep tabaldyryǵyn attaǵanǵa deıin qalyptasady. Sondyqtan, «Balapan»-nyń bala tárbıesindegi orny orasan. Degenmen, bir arna barlyq balany qamtýy múmkin emes. Osyǵan oraı meniń birneshe usynysym bar. Birinshiden, búkil álem tól tarıhyn anımasıa arqyly tanytyp otyr. Bul - týrızmdi damytýdyń da alǵysharttarynyń biri. Biz, Assambleıanyń Analar keńesimen birlesip áleýmettik tanymdyq rolıkter túsirip, halqymyzdyń tarıhyn, mádenıetin tanytatyn anımasıalyq jobalar jasaýdy josparlap otyrmyz. Búginde bizdiń arna efıriniń 80 paıyzyn anımasıalyq ónim toltyryp otyr. Onyń 30 paıyzy ǵana - tól ónim, qalǵan 50 paıyzyn sheteldik mýlthıkaıalarmen toltyrýǵa májbúrmiz», - dedi ol.
Osy oraıda telearnanyń bas prodúseri el Prezıdentinen «Balapan»-nyń anımasıalyq jobalar óndirisin arttyrýǵa yqpal etýdi ótindi.
«Ekinshiden, Qazaqstanda 9-dan 18 jasqa deıingi balalar kóretin arna joq. Iaǵnı, jasóspirimderdiń tanymyn qalyptastyratyn senimdi platforma joq deýge bolady. Sondyqtan, memlekettik tapsyryspen jumys isteıtin telearnalar balalarǵa arnalǵan kontentke kem degende eki saǵat efır ýaqytyn bólýdi suraımyz»,- dedi Sandýǵash Kenjebaeva.