QR Eńbek jáne halyqty áleýmettik qorǵaý mınıstri Svetlana Jaqypova Almaty qalasyna jumys sapary aıasynda megapolıs halqymen kezdesý ótkizdi, onyń barysynda Memleket basshysynyń áleýmettik-eńbek salasyndaǵy tapsyrmalaryn iske asyrý men qazaqstandyqtardy áleýmettik qoldaý sharalaryn kúsheıtý týraly habarlady.
İs-sharaǵa QR EHÁQM Eńbek jáne áleýmettik qorǵaý komıtetiniń tóraǵasy Tólegen Ospanqulov, QR EHÁQM Kóshi-qon komıtetiniń tóraǵasy Asqarbek Ertaev, qalalyq basqarma men aýdandyq jumyspen qamtý jáne áleýmettik baǵdarlamalar bólimderiniń, medısınalyq-áleýmettik mekemelerdiń basshylary, ÚEU ókilderi, múgedektigi bar adamdar, kópbalaly analar jáne taǵy basqa azamattar qatysty. Jalpy kezdesýge 80 adam qatysty.
Sóz basynda Eńbekmıniniń basshysy 2023 jyly memlekettiń barlyq áleýmettik mindettemeleri ýaqtyly jáne tolyq kólemde oryndalǵanyn habarlady.
Memleket basshysynyń tapsyrmasy boıynsha 2023 jyly: eń tómen bazalyq zeınetaqynyń mólsheri eń tómen kúnkóris deńgeıiniń 54 %-dan 60 %-ǵa deıin, al 2024 jyly – 65%-ǵa deıin, eń joǵary mólsheri 100%-dan 105%-ǵa deıin ulǵaıtyldy; yntymaqty zeınetaqyny esepteý úshin qabyldanatyn eń joǵary tabystyń shamasy 46 %-dan 55 aılyq eseptik kórsetkishke deıin artty. Almaty qalasy boıynsha zeınetaqynyń jıyntyq ortasha mólsheri 184 myń teńgeni qurap otyr.
Jalpy respýblıka boıynsha zeınetaqy tólemderine 2023 jyly 3 trln 300 mlrd teńge, 2024 jyly – 3 trln 785 mlrd teńge baǵyttaldy.
Mınıstr sondaı-aq halyqty áleýmettik qoldaýdy kúsheıtý týraly aıtty. Balaly otbasylarǵa erekshe nazar aýdarylady. Jańa sharalar bala týýdy yntalandyrýǵa jáne otbasyndaǵy balalardy tárbıeleýge járdemdesýge, sondaı-aq kópbalaly analardyń bedeli men mártebesin arttyrýǵa baǵyttalǵan.
2023 jyly: memlekettik járdemaqylardyń mólsheri 8,5 %-ǵa ındeksteldi, al Áleýmettik kodekstiń qabyldanýymen keıbir járdemaqylardyń mólsheri qosymsha 14,5 %-ǵa ósti; Memleket basshysynyń tapsyrmasyn oryndaý úshin 2023 jylǵy 1 qańtardan bastap Memlekettik áleýmettik saqtandyrý qorynan bala kútimine baılanysty járdemaqy men áleýmettik tólemderdi tóleý kezeńi bir jastan bir jarym jasqa deıin uzartyldy; Áleýmettik kodekstiń qabyldanýymen «Altyn alqa» alqasymen, I jáne II dárejeli «Ana dańqy» ordenderimen nagradtalǵan, «Batyr ana» ataǵyn alǵan analarǵa járdemaqy mólsheri 7,4 AEK-ke deıin arttyryldy.
Balalary bar otbasylardy qoldaýǵa 2023 jyly shamamen 1,3 trln teńge, 2024 jyly 1,5 trln teńge bólingen.
Osy jyldyń 1 naýryzyna Almaty qalasynda 5 myńnan astam adam júktilikke jáne bosanýǵa, jańa týǵan balany (balalardy) asyrap alýǵa baılanysty tabysynan aıyrylý jaǵdaıy boıynsha 6,1 mlrd teńge somasynda áleýmettik tólem aldy. Bala týýǵa arnalǵan birjolǵy járdemaqy respýblıkalyq búdjet qarajatynan shamamen 1,1 mlrd teńge somasyna 7 myńǵa jýyq adamǵa berildi. Jumys istemeıtin áıelder úshin bir jarym jasqa deıingi bala kútimi boıynsha járdemaqyny respýblıkalyq búdjet qarajatynan 500 mln teńgege 9 myńnan astam adam aldy. Jumys isteıtin ata-analar úshin bir jarym jasqa deıingi bala kútimine baılanysty tabysynan aıyrylý jaǵdaıy boıynsha 6,8 mlrd teńge somasyna 46 myńǵa jýyq adam áleýmettik tólem aldy. Múgedektigi bar balany kámeletke tolǵanǵa deıin tárbıelep otyrǵan anasyna nemese ákesine, bala asyrap alýshyǵa, qorǵanshyǵa (qamqorshyǵa) taǵaıyndalatyn jáne tólenetin járdemaqyny 1,3 mlrd teńgeden astam somaǵa 9 myńǵa jýyq adam aldy.