Osy aptada UQK Shekara qyzmeti Almaty oblysy boıynsha departamentiniń Raıymbek aýdany boıynsha shekara basqarmasyna qarasty «Narynqol» shekara bóliminiń atys alańynda myqtylardy anyqtaýǵa arnalǵan qyzmettik shańǵy bıatlony ótti. Saıysqa atalǵan departamenttiń Raıymbek jáne Qarasaı aýdandary boıynsha shekara basqarmalarynan eki qurama komanda qatysty.
Bıatlonnyń bas tóreshisi — departamenttiń jaýyngerlik daıarlyq jáne áskerler qyzmeti basqarmasynyń aǵa nusqaýshysy, podpolkovnık Murager Maratuly. Ashylý saltanaty «Narynqol» shekara bóliminde ótken soń, komandalar birden «Qostóbe» shekara bólimshesindegi shaǵyn polıgonǵa attandy. Olar barǵan kezde shyńyltyr aıaz qarsy alǵanymen, eshkim de oǵan moıyǵan joq. Jeńiske jetip, alda Shekara qyzmeti aıasynda ótetin bıatlonǵa joldama alý úshin komandalar kez kelgen qıyndyqty eńserýge tas-túıin daıyn boldy.
Saıys barysynda shańǵyshylar bes shaqyrymdyq qashyqtyqty baǵyndyrýmen qatar, granata laqtyryp, qos qarýdan — Kalashnıkov avtomaty men mergender vıntovkasynan nysana kózdeýge tıis boldy. Tártipke sáıkes, jattyǵý kezinde nysanaǵa dál tımegen qatysýshylar 70 metrlik aıyp alańyn aınalyp ótedi. Sondaı-aq, ár komandanyń quramynda bir kınolog bar. Olar ózderiniń qyzmettik ıtterimen birge saıysqa qatysyp, joǵary daıyndyq deńgeıin kórsetti.
Aıta ketý kerek, Raıymbek aýdany boıynsha shekara basqarmasynyń atynan qatysqan komandanyń kapıtany, «Tekes» shekara bólimshesiniń bastyǵy kapıtan Nurbol Temirbaev shańǵy tebýden sport sheberligine kandıdat eken. Onyń qar ústindegi qımyl-qozǵalysy da naǵyz sheber ekenin ańǵartyp turdy. Nurbol saıys barysynda birinshi kelip, osyǵan deıingi rekordty jańartty.
Osylaısha, birneshe saǵatqa sozylǵan qyzmettik shańǵy bıatlonynda granata laqtyryp, nysana kózdeýde ózderiniń mergendigin kórsetken Raıymbek aýdany boıynsha shekara basqarmasynyń qurama komandasy birinshi oryndy ıelendi. Buǵan «Qostóbe» shekara bólimshesinde bir aı boıy júrgizilgen daıyndyqtyń zor kómegi tıgeni anyq.
Jeńimpazdardy marapattaý rásimi Súmbe aýylyndaǵy mádenıet úıinde ótti. 2023 jyldyń jeltoqsan aıynda qurylysy aıaqtalyp, paıdalanýǵa berilgen zamanaýı rýhanıat ordasynyń qasıetti sahnasynda báıgede baǵy janǵan Raıymbek aýdanynyń komandasy departament bastyǵy polkovnık A.Kaıýpovtyń gramotasymen marapattalyp, moıyndaryna medal taǵyldy.
Rásimniń sońy mádenıet úıindegi jas ónerpazdardyń shaǵyn konserttik baǵdarlamasyna ulasty. Ulttyq naqyshtaǵy kıim kıgen jas bıshiler men ánshiler jarysqa qatysýshylar men «Súmbe» shekara bólimshesiniń jeke quramyna kóterińki kóńil kúı syılady.
Endi báıgede top jarǵan komanda Aqmola oblysynyń Derjavınsk qalasynda ótetin alamanda UQK Shekara qyzmeti Almaty oblysy boıynsha departamentiniń namysyn qorǵaıtyn bolady.