Almatyda osyndaı ataýmen Nurtileý Imanǵalıulynyń 70 jyldyǵyna arnalǵan kórmeler tizbeginiń ashylýy ótedi.
Ashylý saltanatyna Almaty qalasy ákimdiginiń ókilderi, qazaq televızıasynyń maıtalmandary, BAQ jáne mýzeı dostary qatysady, dep habarlaıdy Almaty-akshamy.kz.
Alǵashqy kórme Nur-Sultan qalasynda mamyr aıynda Qazaqstan Respýblıkasynyń Ulttyq mýzeıiniń uıymdastyrýymen ótken.
Nurtileý Imanǵalıuly 1952 jyly 14 mamyrda Almaty oblysy, Aqsý aýdany, Qarasý aýylynda dúnıege kelgen. Qazaq ýnıversıtetiniń jýrnalısıka fakúltetiniń túlegi. 1974 jyldan bastap Qazaq televızıasynyń «Jastar» redaksıasynda tilshi, redaktor, bas redaktor, saıası sholýshy, «Habar» agenttiginde moderator-júrgizýshi bolyp qyzmet etti. 2003-2006 jyldary QR Úkimet Keńsesiniń Áleýmettik-mádenı damý bóliminiń sektor meńgerýshisi, QR Prezıdent Ákimshiliginde bas maman qyzmetterin atqardy.
2006-2008 jyldary Respýblıkalyq «Qazaqstan» teleradıo korporasıasynda Basqarma tóraǵasy bolyp eńbek etti.
Nurtileý Imanǵalıuly sanaly ǵumyrynyń jarty ǵasyryn televızıaǵa arnaǵan. Qazaq televızıasynda 4500-dan astam habardyń avtory. «Qurdastar», «Jastar daýysy», «Araı», «Altybaqan», «Betpe-bet», «Qoltańba» t.b. avtorlyq baǵdarlamalaryn jasady.
Nurtileý Imanǵalıuly - Qazaqstannyń Qurmetti jýrnalısi, QR Jazýshylar odaǵynyń múshesi, Almaty oblysy jáne Aqsý aýdanynyń Qurmetti azamaty, Qazaqstan Respýblıkasynyń Eńbek sińirgen qaıratkeri. 2018 jyly «Parasat» ordenimen marapattaldy.
Kórmede Nurtileý Imanǵalıulynyń jeke zattary, qujattary, kitaptary men marapattary qoıylǵan.
Jyl boıyna «Baı-qýatty bolaıyq» atty kórmeler tizbegi Qazaqstannyń basqa qalalarynda da jalǵasyn tappaq.