Ne baıqadyńyz?
Jumysqa eki demalyp kelemin, eki avtobýsqa otyryp kelemin degenim ǵoı. Negizi, jol boıynda, avtobýstyń ishinde de ómir, tirshilik, túrli adam, túrli minez bar.
203-shi AVTOBÝS.
Aldyńǵy oryndyqta beri qarap bozbala otyrǵan-dy telefonyn shuqylap. Bir kezde telefonyn janyna qoıdy da, ózi terezege qarap qaldy. «Qap, qazir oılanyp otyrǵanda telefonyn umytyp ketpeı me eken» dep oıladym, uldar kóbine alańǵasarlaý keledi ǵoı jalpy. Sóıtsem, avtobýs beıitter mańynan ótip bara jatqanda, álgi bala betin sıpady. İshinen duǵa jasaǵan boldy ǵoı. Iman kerek.
Bir kezde avtobýsqa 60-qa taıap qalǵan er adam mindi. Ary-beri qarap edi, bos oryn bolmady. Ádep saqtaǵany ma, shamaly jer turyp bardy. Bir kezde qarsy aldynda otyrǵan jigitke:
– Balam, ekeýmiz kezektesip otyraıyq. Aıaǵymnyń aýyratyny bar edi. Sálden soń sen otyrasyń, – dedi. Bul da durys. Áıtpese, keıde úlkendigimizdi mindetsinip, «Áı, bala, tur káni! Oryn berýdi bilmeısińder, tárbıe qaıda?!» dep dikeńdep ala jóneletinimiz ótirik emes qoı.
120-shy AVTOBÝS.
Avtobýsqa egdeleý eki áıel dabyrlaı áńgimelesip kirdi. Jalǵyz otyrǵan meni úlkensindi me, árirekte otyrǵan orys kelinshegine: «Siz anaý bos orynǵa otyrasyz ba, biz ekeý bolyp otyrsaq dep edik», – dedi. Áıel otyrmaımyn dedi. «Men sizden ótinip surap turmyn ǵoı, mańyzdy áńgimemiz bar edi», – dedi. Sonda da qozǵalmady áıel. Al ótingen áıel «artyńdy kóterýge erinip otyrsyń ba, sonshama» degen sıaqty jaman-jaman sózderdi qarsha borata bastady. Tań atpaı kóńil-kúıdi nildeı buzatyn sózder! Arty úlken shýǵa aınalmasyn dep men turyp oryn bosattym.
Aldynda menimen birge bir áıel kirip edi avtobýsqa. Bireýge telefon soqqan. 35 mınýt júrip keldim. Men túsip bara jatqanda sol áıel áli sóılesip otyr eken. Netken júıke! Meıli, ózi biledi ǵoı, qansha sóılesse de. Ózine jaqsy bolsa, shopyr baqyrtyp qoıyp qoıǵan «Cheee tam, che tam, che tam, qaryndas» degen óleńdi (qazirgi «zamanaýı» ánderimizdiń biri) qosa tyńdap, ári qaraı kete bersin.
Jolyńyz bolsyn, jolaýshy!