Bólingen qarjy aýyldyqtarǵa jete ma?
«Aýylda densaýlyq saqtaýdy jańǵyrtýǵa» 8,5 trln teńge jumsalmaq. Bul týraly Premer-mınıstrdiń orynbasary-Qarjy mınıstri Erulan Jamaýbaev Senattyń jalpy otyrysynda málimdedi, -dep habarlaıdy Almaty-akshamy.kz BAQ.KZ-ke silteme jasap.
Mınıstr bıylǵy qazyna qarajatyna toqtaldy.
Birqatar mańyzdy mindettemeni iske asyrýǵa 186 mlrd teńge baǵyttalatyn bolady. Búdjetti qaıta qaraý nátıjesinde ekonomıkanyń naqty sektory men óńirlerdi qoldaýǵa erekshe mán berildi. Buny shyǵys qurylymynyń ózgerýinen baıqaýǵa bolady. Atap aıtsaq, ekonomıkanyń naqty sektoryn qoldaýǵa qosymsha 1,3 trln teńge kózdelgen. Tıisinshe, shyǵystyń jalpy kólemindegi bul baǵyttyń úlesi 5,3 paıyzǵa ulǵaıdy, - dep atap ótti vedomstvo basshysy.
Aıtýynsha, ekonomıkanyń naqty sektoryna baǵyttalǵan shyǵys 3,5 trln teńgege jetedi.
Nátıjesinde atalǵan salaǵa arnalǵan shyǵys 3,5 trln teńge nemese jalpy shyǵystardyń 15,6 paıyz mólsherinde josparlanyp otyr. Bul orta merzimde eldiń damýyna oń mýltıplıkatıvtik áser etedi. Áleýmettik salanyń shyǵysy 298 mlrd teńgege ulǵaıtyldy jáne 8,5 trln teńge nemese búdjettiń jalpy shyǵysynyń 37,5 paıyzyn qurady, - dedi mınıstr.
Sonymen qatar ol qarajattyń qaıda jumsalatynyn naqtylady.
Qarajat «Aýylda densaýlyq saqtaýdy jańǵyrtý» ulttyq jobasyn iske asyrýǵa, mektepke deıingi bilim berý mekemeleri pedagogteriniń jalaqysyn kóterýge jáne kolej stýdentterdiń stıpendıalaryn ulǵaıtýǵa, áleýmettik tólemderdiń, járdemaqylardyń mólsherlerin arttyrýǵa, densaýlyq saqtaý júıesin odan ári damytýǵa baǵyttalady. Kúsh qurylymy shyǵysy 317 mlrd teńgege ósip, 2,5 trln teńge kóleminde bolady. Naqtylaý kezinde aǵymdaǵy jyly óńirlerge respýblıkalyq búdjetten 7,2 trln teńge nemese búdjettiń jalpy shyǵysynyń 32 paıyzy baǵyttalady, - dedi Úkimet basshysynyń orynbasary.