10 sáýirde Qazaqstan Respýblıkasynyń Premer-Mınıstri Oljas Bektenov bastaǵan Respýblıkalyq shtabtyń aıasynda Aýyl sharýashylyǵy mınıstri Aıdarbek Saparov Batys Qazaqstan oblysyna jumys saparymen bardy.
Sapar barysynda mınıstr sý tasqynynan zardap shekken eldi mekenderdiń turǵyndarymen, sondaı-aq osy aýdandarda egin sharýashylyǵymen aınalysatyn sharýalarmen kezdesti. A.Saparov turǵyndar men kásipkerlerdiń máselelerin tyńdap, sý tasqyny saldarynan ólgen aýyl sharýashylyǵy maldarynyń ıelerine keltirilgen shyǵyndy óteý baǵytynda qandaı jumystar atqarylyp jatqanyn aıtty, dep habarlaıdy Almaty-akshamy.kz Aýyl sharýashylyǵy mınımstrligine silteme jasap.
«Mal ıeleri jergilikti jerdegi shyǵyndy óteý komısıalaryna júginip, maldyń joǵalý faktisin qujattandyrýy kerek, sol arqyly ótemaqy alýǵa bolady», - dedi A.Saparov.
Mınıstr mal ólekselerin joıý jumystarynyń barysyn tekserip, jergilikti jerlerde jumys júrgizip jatqan Respýblıkalyq epızootıalyq jasaq fılıalynda qajetti quraldyń bar-joǵyna kóz jetkizdi. Epızootıalyq jaǵdaıdyń nasharlaýyna jol bermeý maqsatynda jumysty jandandyrýdy tapsyrdy.
Sondaı-aq, Aıdarbek Saparov Respýblıkalyq veterınarıalyq zerthananyń Oral qalasyndaǵy oblystyq fılıalynda boldy. Onda buǵan deıin sibir jarasy kómilgen jerlerden sý basqan topyraq synamalary jetkizilgen.
Esterińizge sala keteıik, Batys Qazaqstanda sý tasqyny saldarynan sibir jarasynyń 3 kómilgen orny sý astynda qaldy. Veterınarıa jáne medısına mamandarynan quralǵan arnaıy jumys toptary osy ýchaskelerden topyraq úlgilerin aldy. Olar Respýblıkalyq veterınarıalyq zerthananyń aımaqtyq fılıaldary men Ulttyq veterınarıalyq referenttik ortalyqqa jetkizildi. Barlyq synaqtar teris nátıje kórsetti, ıaǵnı topyraq úlgilerinde sibir jarasynyń sporalary anyqtalǵan joq.