Sybaılas jemqorlyqqa qarsy qyzmet bilim berý salasyndaǵy iri jymqyrýlardy tergep jatyr. Qylmystar memlekettik aýdıtorlardyń jasyrýshylyǵymen jasalǵany qylmystyq isterdiń materıaldarymen rastaldy, dep habarlaıdy Almaty-akshamy.kz Zakon.kz-ke silteme jasap.
Mysaly, Jetisý oblysynda búdjet qarajaty "óli jandardyń" shottaryna aqsha aýdarý jáne mektep qyzmetkerleriniń jalaqysyn asyra eseptep, keıinnen olardy qolma-qol aqshaǵa aınaldyrý men ıemdený arqyly urlanǵan.
«Tergeý barysynda Almaty oblysy Tekserý komısıasynyń memlekettik aýdıtory 500 myń teńge somasynda para alǵany áshkerelendi. Ol Taldyqorǵan qalasyndaǵy mektepterdiń birinde aýdıtorlyq tekseristiń oń qorytyndysy úshin para alǵan. Qazir aýdıtor sotqa tartyldy», - dedi Sybaılas jemqorlyqqa qarsy is-qımyl agenttiginiń resmı ókili Arman Tleýkenov.
- Osyǵan uqsas fakt Almaty oblysynda anyqtaldy. Onda oblystyq tekserý komısıasy bóliminiń basshysy Qarasaı aýdanynyń bilim bóliminiń býhgalterinen aýdıtorlyq tekserýdiń oń nátıjeleri úshin 1 mln teńge somasynda para alǵan. Osy fakti boıynsha Almaty oblysynyń Sybaılas jemqorlyqqa qarsy qyzmeti sotqa deıingi tergeý júrgizip jatyr.
- Sonymen qatar Túrkistan oblysynda memlekettik revızor - oblystyq Tekserý komısıasynyń bas ınspektory paraqorlyqpen áshkerelendi. Ol Saryaǵash aýdanyndaǵy mektepterdiń birinde aýdıtorlyq tekseristiń oń qorytyndysy úshin 26 mln teńge kóleminde para aldy degen kúdikte. Kúdikti ustalyp, ýaqytsha ustaý ızolátoryna qamaldy.
«Qylmystyq-prosestik kodeksiniń 201-babyna sáıkes ózge de aqparat jarıa etýge jatpaıdy. Konstıtýsıanyń 77-baby 3-tarmaǵynyń 1-tarmaqshasyna jáne Qylmystyq-prosestik kodeksiniń 19-baby 1-bóligine sáıkes, qylmystyq quqyq buzýshylyq jasaýdaǵy kinási sottyń zańdy kúshine engen úkimimen belgilengenge deıin árbir adam kinásiz dep esepteledi», - delingen agenttik habarlamasynda.