Kólik arnaýly turaqqa qoıyldy
Atyraý turǵyny 3 mıllıon teńgege jýyq aıyppuly tólenbegen kólikti satyp alǵanyn bilmegen. Oblystyq polısıa departamentiniń málimetinshe, Grýzıada tirkelgen kóliktiń tólenbegen 106 aıyppuly bary anyqtalǵan, dep habarlaıdy Almaty-akshamy.kz.
«Polıseıler 6 maýsym kúni saǵat 12.00 shamasynda Toyota Highlander avtokóligin toqtatqan. Kóliktiń rýlinde 1998 jyly týǵan júrgizýshi boldy. Grýzıada tirkelgen kóliktiń 2 mln 937 myń 417 teńge kóleminde tólenbegen 106 aıyppuly bary, saqtandyrý júıesinde aqparat tirkelmegeni anyqtaldy», – dedi polıseıler.
Sondyqtan avtokólik ıesine Ákimshilik quqyqbuzýshylyq týraly kodekstiń 230-baby 2-bóligimen hattama toltyryldy. Kólik arnaýly turaqqa qoıyldy.
Kólik júrgizýshisi kólikti 2-3 kún buryn satyp alǵanyn jáne 106 aıyppuly baryn bilmeıtinin aıtqan.