25 jeltoqsanda Atyraý oblysynyń polısıasyna bir otbasy joǵalǵany týraly aryz túsken. "Aq Jaıyq" basylymy oqıǵa ornyndaǵy jaǵdaıdy málimdedi, - dep habarlaıdy aqshamnews.kz tilshisi.
Jangeldın aýylynyń joǵalǵan turǵyndarynyń isi boıynsha kúdikti buryn turǵan Geolog yqshamaýdanynda izdeý jáne tergeý jumystary júrip jatyr.
Al otbasy músheleri Naýryz ben Mıramgúldi izdeý bes kúnnen asa ýaqyttan beri jalǵasyp jatyr.
Qazir aýmaqta polısıa men Ulttyq ulannyń az ǵana kúshi jumyldyrylǵan. Jyljymaly shtab qurylǵan. Quqyq qorǵaýshylardyń aıtýynsha, izdeý men tergeý jumystary toqtaǵan joq, buryn munda aýqymdy sharalar ótkizilgenine qaramastan jalǵasyp jatyr.
Polısıa qyzmetkerleriniń biri aty-jónin atamaýdy surap, tergeý barlyq nusqany qarastyryp jatqanyn aıtty. Onyń ishinde kúdiktiniń turǵan jerine baılanysty nusqa da bar.
Bul aýmaqqa nazar aýdarylýy beker emes. "Aq Jaıyq" málimetinshe, kúdikti Sultan Sarsemalıev pen jubaıy Aqbaıan osy mańda 50 myń teńgege ýaqytsha úı jaldap turǵan. Olar biraz ýaqyt sonda ómir súrgen. Kórshiles úılerdiń bir bóligi bos, bir bóligi jalǵa berilgen.
Úıdiń ishinde tergeýshilerdiń muqıat jumysynyń izderi baıqalady. Bólme tolyq qaralǵan, zattar shashylyp jatyr. Bólmeniń ortasynda kilem uqyptap jınaýly tur. Terezeniń bir jaqtaýynan plombany alǵannan keıin tergeý kezinde qoldanylatyn qyzyl boıaýdyń izi qalǵan.
Aýla men mańaıda buryn júrgizilgen jumystardyń izderi saqtalǵan. Jer qazylǵan, keı jerlerde tehnıkanyń izderi kórinedi. İzdeý úshin buǵan deıin kóp kúsh pen arnaıy quraldar tartylǵan. Ásirese, jer astyndaǵy nysandardy tabýǵa arnalǵan georadar qoldanylǵan. Ony Oraldan jetkizgen. Sol quraldyń kómegimen aýla, mańaıdaǵy ýchaskeler jáne úıdiń aınalasy túgel tekserilgen.
Bul aýdan birkelki salynbaǵan, saıajaılarmen shektesedi. Munda beınebaqylaý kameralary az. Kórshilerdiń kameralary jazbalardy 15 kúnnen artyq saqtamaıdy, bul oqıǵanyń hronologıasyn qalpyna keltirýdi qıyndatady.
Kórshiles Ózbekstan azamattary turady. Olardyń aıtýynsha, eshqandaı kúmándi jaǵdaıdy estimegen, kórmegen. Tergeý barysynda yqshamaýdannyń basqa turǵyndary da suraldy. Barlyǵy da janjal, shý nemese oǵash áreketterdi baıqamaǵanyn aıtty.
Kórshileri otbasyn tuıyq adamdar dep sıpattaıdy. Olar syrtqa sırek shyqqan, aınaladaǵy adamdarmen kóp aralaspaǵan.
İzdeý barysynda aýla men mańaı túgel tekserilgen: qazý jumystary júrgizilgen, shóp pen qamys shabylǵan. Biraq ázirge nátıje joq. Jumysty dalaǵa jaqyn ornalasýy, temirjoldyń bolýy, laı men aýa raıynyń qolaısyzdyǵy qıyndatyp otyr.
Resmı túrde tergeý barlyq nusqany qarastyryp jatyr. Degenmen júrgizilip jatqan jumystar joǵalǵandardyń qaza bolýy múmkin degen boljamǵa kóbirek kóńil bólinip otyrǵanyn kórsetedi.
İzdeý jáne tergeý jumystary jalǵasyp jatyr.