Jasandy ıntellektimen adam densaýlyǵyn jaqsartý.
Astanalyq dárigerler bıoınjenerıanyń sońǵy jetistikterimen tanysty. Sheteldik mamandarmen biliktilik almasý barysynda robotty qoldaný arqyly kúrdeli operasıa túrleri júrgizildi, dep habarlaıdy almaty-akshamy.kz 24.kz-ke silteme jasap.
Qazaqstanda býyn aýrýlary órship barady. Elde jyl saıyn 15 myń adam býyn almastyrý operasıasyn qajet etedi. Naýqasqa shuǵyl em-dom jasaýda jasandy ıntellektiniń kómegi zor. Buǵan astanalyq dárigerler kóz jetkizdi. AQSH-ta jasalǵan robot 5 naýqasqa endoprotezdeý boıynsha operasıany sátti ótkizdi. 3D skanerleýdiń arqasynda robot ımplantty minsiz ornatty. Bul adam aǵzasynda keıin aýyrsyný men asqynýlardy boldyrmaıdy deıdi mamandar.
Asqar Beknazarov, Ulttyq ǵylymı travmatologıa jáne ortopedıa ortalyǵynyń dárigeri: - Biz, hırýrgtar, ózderimiz jasaıtyn bolsaq, birneshe etaptan jasaımyz. Al robot bir etappen sol protezdi qoıýǵa kómektesedi. Ol degenimiz, operasıanyń uzaqtyǵy da qysqarady. Jáne jaraqat alýy da az bolady naýqastyń. Naýqastyń otadan keıin saýyǵýy tez bolady.
Dárigerlerdiń aıtýynsha, býyn aýrýlary alpysty alqymdaǵandar arasynda beleń alǵan. Shymkentten kelgen Záýre Baıteevaǵa robottyń kómegimen ota jasaldy. Qazir jaǵdaıy jaqsy, júrip-turýym áldeqaıda jeńildedi deıdi.
Záýre Baıteeva, Shymkent qalasynyń turǵyny: - Biri kúni robotpen operasıa istedi, óte sátti ótti dep oılaımyn, eshteńe baıqamadym, sezbedim, bári jaqsy boldy, ózim kirip shyǵa beremin.
Dárigerler robot bolashaqta travmatologıa salasynda turaqty qoldanylatynyna senimdi. Operasıa zalynda ol senimdi kómekshi deıdi. Al bul óz kezeginde býyn fýnksıasynyń buzylýynan qıyndyq kórgen naýqastarǵa jedel kómek berýge úlken múmkindik.