QR IIDM Azamattyq avıasıa komıtetiniń ókilderi Qazaqstan men Katar arasyndaǵy reıster sany artatyny týraly málimdedi, - dep habarlaıdy Almaty-akshamy.kz Tengritravel.kz-ke silteme jasap.
2023 jylǵy 26-27 shildede Qazaqstan men Katardyń avıasıalyq bıligi arasynda eki el tasymaldaýshylarynyń qatysýymen kelissózder ótti. Kelissózder qorytyndysy boıynsha reısterdi oryndaý úshin quqyqtyq bazany keńeıtetin ózara túsinistik týraly Memorandýmǵa qol qoıyldy:
- ár taraptan Astana jáne Doha qalalary arasynda aptasyna 7-den 14 reıske deıin;
- ár taraptan Almaty jáne Doha qalalary arasynda aptasyna 7-den 14 reıske deıin;
- "aýa erkindiginiń" 5 dárejesin qosa alǵanda, ár jaǵynan aptasyna 7-den 10-ǵa deıin júk reısi.
Osylaısha, ruqsat etilgen jıilikter sany aptasyna 21-den 38 reıske deıin ósti.
Qol jetkizilgen ýaǵdalastyqtar negizinde "Qatar Airways" áýekompanıasy aǵymdaǵy jyldyń sońyna deıin Almaty - Doha baǵyty boıynsha oryndalatyn reıster sanyn kúnine 1-den 2 retke deıin (aptasyna 7-den 14 reıske deıin) ulǵaıtýdy josparlap otyr.
Sondaı-aq, 2024 jyldyń ortasynda áýekompanıa Astana-Doha baǵyty boıynsha áýeqatynasyn ashýdy josparlap otyr. Qazirgi ýaqytta "Qatar Airways" áýekompanıasy Qazaqstanǵa baǵyt boıynsha reısterde, onyń ishinde "Boıng-787 Drımlaıner" úlgisindegi keń fúzelájdy áýekemelerin paıdalanady. Kelissózder barysynda áýekompanıa Qazaqstan Respýblıkasyna reısterde áýekemeleriniń osy túrlerin paıdalanýdy arttyratynyn habarlady.