QR Qorǵanys mınıstrligi Tárbıe jáne ıdeologıalyq jumystar departamentiniń bastyǵy ádilet polkovnıgi Tileýhan Basqojaev Aqtaý garnızonyna baryp, sarbazdarmen jáne komandırlermen kezdesti, dep habarlaıdy almaty-akshamy.kz
Teńiz jaıaý áskerleri, Áýe shabýylyna qarsy qorǵanys brıgadalarynyń jáne materıaldyq-tehnıkalyq qamtamasyz etý bazasynyń jeke quramymen kezdesýde ádilet polkovnıgi Tileýhan Basqojaev 2024 oqý jylynda Qarýly kúshterdiń aldyna qoıylǵan mindetterdi aıtty. Sonymen qatar, "Egemen Qazaqstan" respýblıkalyq gazetinde jarıalanǵan el Prezıdentiniń suhbatyndaǵy negizgi tezısterge jeke toqtaldy.
Departament bastyǵy kezdesýge qatysýshylardy áskerı qyzmetshilerdiń áleýmettik paketindegi ózgerister týraly habardar etti.
– Sońǵy úsh jyl ishinde laýazymdyq jalaqyny kezeń-kezeńmen ulǵaıtý júrgizildi. Bıyl Qarýly kúshterdegi qatardaǵy jáne serjanttyq quram laýazymdarynyń tarıftik sanattary jáne áskerı qyzmetshilerdiń áskerı ataǵy boıynsha jalaqylary 30%-ǵa ósedi, – dedi Departament bastyǵy.
Ol sonymen qatar qorǵanys vedomstvosynyń merzimdi qyzmettegi sarbazdaryna arnalǵan kredıttik demalystar, al armıada qyzmet atqarǵan azamattarǵa bilim berý jeńildikterin berýge qatysty jobalardy egjeı-tegjeıli túsindirip berdi.
Komandırlermen áńgimelesý barysynda ádilet polkovnıgi Tileýhan Basqojaev áskerı ujymdarda qolaıly moraldyq-psıhologıalyq ahýaldy saqtaýdyń mańyzdylyǵyna nazar aýdardy. Ol oqý-jaýyngerlik tapsyrmalardy sátti oryndaý kóbine osyǵan baılanysty ekenin atap ótti. Kezdesýde áskerı bólimderdi jasaqtaý, ofıserler men serjanttardy rotasıalaý máseleleri de qozǵaldy.
Shabýyldaý batalónynyń shtab bastyǵy aǵa leıtenant Jánibek Azambaı kezdesý barysynda marapatqa ıe boldy. Jaýyngerlik jáne memlekettik-quqyqtyq daıyndyqtaǵy jetistikteri úshin ádilet polkovnıgi Tileýhan Basqojaev Qorǵanys mınıstriniń atynan áskerı qyzmetshige qol saǵatyn tabys etti.