Bıylǵy Ant qabyldaý rásimi búkil el bolyp ulyqtap jatqan Uly Jeńistiń 80 jyldyǵymen qatar kelip otyr. Sondyqtan kóktem aıynda shekarashylar sapyna alynǵan jas sarbazdar úshin búgingi sharanyń mańyzy erekshe.
UQK Shekara qyzmeti Almaty oblysy boıynsha departamentiniń oqý bazasynda ótken rásimde 500-ge jýyq jas sarbaz Otanyna adal qyzmet etýge saltanatty túrde sert berdi. «Sarbaz boldym, minekı» demekshi, osy sátten bastap Otan qorǵaýshylardyń qataryna qosylǵan jas sarbazdardyń ómirindegi eń sáýleli kezeńge kýá bolý úshin alystan ata-analary, týǵan-týystary men dostary arnaıy keldi. Atap óterligi, sap túzegen sarbazdar elimizdiń barlyq óńirlerinen áskerge shaqyrylǵan.
Sharaǵa «Generaldar keńesi» respýblıkalyq qoǵamdyq birlestigi Prezıdıýmynyń tóraǵasy, otstavkadaǵy general-leıtenant Beksultan Sársekov, Shekara qyzmetiniń ardageri, áskerı ǵylymdar doktory, profesor, Qazaqstan Respýblıkasy Áskerı ǵylymdar akademıasynyń akademıgi, otstavkadaǵy general-maıor Shyntas Ótepov, sondaı-aq Naýryzbaı aýdanynyń quzyrly organdarynyń ókilderi qatysty.
Elimizdiń Memlekettik Ánurany shyrqalǵannan keıin Ant qabyldaý rásimi bastaldy. Sarbazdardyń birkelki júristeri men qımyldary olardyń áskerı tártipke boı úıretip, temirdeı tártipke qalyptasyp úlgergenin ańǵartty.
Sarbazdar departament bastyǵy, polkovnık Álibek Amangeldiuly Kaıýpov pen ardager sardarlardyń aldynda ant berdi. Rásimniń kelesi bóliminde – naǵyz shekarashyǵa aınalǵan sarbazdardy quttyqtaý sáti ótti. Qonaqtar jas sarbazdarǵa aldaǵy qyzmetterine sáttilik tilep, aq batalaryn berdi.
Shara barysynda polkovnık Álibek Kaıýpov «Srochnık 2.0» baǵdarlamasy aıasynda «Kóktem–2024» shaqyrylymynda úzdik shyqqan jeti sarbazǵa sertıfıkat tabystady. Bul qujattar sarbazdardyń ózderi qalaǵan joǵary oqý oryndaryna túsýlerine múmkindik beredi. Polkovnık olardyń Otan aldyndaǵy qyzmetine alǵys bildirdi.
Shekarashylardyń kez kelgen sharasy departamenttiń saıypqyrandary qatysatyn erekshe kórinistermen jalǵasatyny belgili. Bul joly da olar qoıan-qoltyq urystyń jáne shekara buzýshyny quryqtaý tásilderiniń ádis-amaldaryn kópshilikke sheber kórsetti. Sonymen qatar, Shekara qyzmeti Qyzmettik kınologıa basqarmasynyń mamandary ulttyq maqtanyshymyzǵa aınalǵan tazy men tóbetti ortaǵa shyǵaryp, olardyń erekshe daıyndyǵyn pash etti.
Sondaı-aq, jınalǵan jurt sarbazdardyń ata-analary men baýyrlary aldynda sap túzep ótken atbegiler men olardyń qyzmet attarynyń ónerin tamashalady.
Shara sońynda departamenttiń jaýapty tulǵalary ata-analarmen júzdesip, kópshilikti mazalaǵan suraqtarǵa tushymdy jaýap berdi.